روائع الشاعر السوداني.. التيجاني حاج موسى!!!

من طرف ود..نقد الأربعاء مايو 05, 2010 7:18 pm

أمى

الحان الشاعر .. أداء الفنان كمال ترباس

أمى .. الله يسلمك

ويديكى لى طول العمر..

وفى الدنيا يوم ما يألمك ..

امى .. الله يسلمك ..

* * *

أمى يا دار السلام

يا حصنى لو جار الزمان ،

ختيتى فى قلبى اليقين

يا مطمنانى .. بطمنك

أمى .. الله يسلمك

***

خيرك على بالحيل كتير ،

يا مرضعانى الطيبة بالصبر الجميل ،

يا سعد أيامى وهناى

لو درتى قلبى ، أسلمك.

أمى .. الله يسلمك

***

أنا مهما أفصح عن مشاعرى

برضو بيخونى الكلام

وقولة ( بحبك )

ما بتكفى وكل كلمات الغرام

يا منتهى الريد ومبتداه ..

يا الليا .. الله يسلمك ..

ويديكى لى طول العمر

وفى الدنيا يوم ما يألمك ..

أمى .. الله يسلمك ..

من طرف ود..نقد الأربعاء مايو 05, 2010 7:24 pm

صباح الخير

الحان الموسيقار يوسف حسن الصديق

اداء محمود تاور ومجموعة الأطفال

قول صباح الخير

وابدأ يومك بالتحية

هش وأبسم ..

وأطر الهم والأسية

وأحضن الناس بى عيون ضاحكة ونديه

ياما بالكلمة الحنينة

ينفتح ليك الف باب

باب محنة وباب سعادة

باب أحبة وباب صحاب

تقضى يوم كلو فرحة

لا ملامة ولا أكتئاب

جرب أغفر للبخونك

تلقى أعدائك قلال

لقمة العيش النضيفة

تحلى بي كسب الحلال

إمتحان اجتازو وأصبر

مافى شىء عندك محال

من طرف ود..نقد الأربعاء مايو 05, 2010 7:26 pm

الدنيا جميلة

الحان الموسيقار يوسف حسن الصديق

اداء مجموعة الأطفال

شوفو دنيتنا الجميلة

بوديانها وصحاريها ونخيلها

بأنهارها وباشجارها الظليلة

ماهى دنيتنا الجميلة

الشمس كل يوم بتطلع

أصلو ما اتاخر شروقها

فى العشية تسيبنا تغرب

روعة سبحانو البسوقها

ماهى دنيتنا الجميلة

أربعة فصول فى السنة

بمرو عبر الأزمنة

الشتا والصيف ، وربيع وخريف

وده بيحصل كيف ؟

ماهى دنيتنا الجميلة

أى واحد فينا لو فكر وقدر

عظمة الخالق بتظهر

يبقى واجبنا العلينا

نبتهل نرفع أيدينا

ونعمل المفروض علينا

الله بقبل...

من طرف ود..نقد الأربعاء مايو 05, 2010 7:27 pm

أغنية للاطفال

لحن واداء الفنان محمود تاور

طفل بصرخ فى البوادى

دابو فى سن الفطام

طفل عز الليل ينادى

يلا نديهو الطعام

***

وقبلما نديهو لقمة

نفتح الاحضان نضمو

شان يحس طعم الأمان

شان نعوضو فقد أمو

وكل بيت نفتح لى بابو

وكل واحد يبقى عمو

وترجع الضحكة لعيونو

وينسى حزنو وينسى همو

قيمة الأوطان أصيلة

فينا من زمنا قبيل

محنة بتعدى وتزول

مافى أبدا مستحيل

وبالعزيمة تهون صعاب

والعسير يصبح يسير

ويرجعو الغايبين سنين

تانى للبيت الكبير

من طرف ود..نقد الأربعاء مايو 05, 2010 7:29 pm

طلع الصباح

الحان واداء الموسيقار محمد عجاج

أطرد النوم من عيونك

ما خلاص طلع الصباح

خلى بالك للبخونك

يلاحى على الفلاح

***

وابدأ أول خطوة أمشى

الطريق لسه طويل

لسه قدامك مسافة

الف فرسخ والف ميل

وانت يا سودان قيافة

فيك تراب راويهو نيل

وانت يا سودان ثقافة

من زمن دقنه وخليل

نادى أولادك وأصرخ

غربتم طالت سنين

وأفتح أحضانك وأفرح

وضمهم بس بى حنين

واوعى تطلع كلمة تجرح

وتانى نرجع للانين

والزمن يسرقنا يسرح

وتانى يسلبنا اليقين

***

خلى بالك للمدارس

خلى بالك حصة حصة

وللكراريس أبقى دارس

والدرس نقراهو هسة

للفصول خليك حارص

ما تضيع فيها قشة

وللتلاميذ أبقى حارس

همه طينة ولسه هشه

الصبر هد الجبال

وانت صبرك ما اعتيادى

وخلى ضراعتك طوال

توصل القرى والبوادى

لمهم لمة رجال وطوف بلاد الدنيا نادى

وعلمهم كيف النضال

وافتخر قول ديل ولادى

السودان الجديد

الحان الموسيقار محمد آدم المنصورى

اداء الفنان خليل اسماعيل

يا جمالك يا بلادى جيت أغنيلك نشيد

ما خلاص نادى المنادى ( اتولد سودان جديد )

***

لو عذابك طال كتير وبالسنين مستحملا هو

وضقتى ويلات السعير وشفتى من الويل شقاهو

الشروق ساطع منير والأرض مستنياهو

يبقى كل الجاى خير يمسح القبلو ووراهو

***

وأنت يا شعبي النبيل فيك ملامح ما بتزول

أنت من أصلك أصيل خاتى كلماتة وخاتى قول

أنت يالدغرى وعديل انت يا العارف الاصول

يشهد التاريخ قبيل فيهو مثلت الفصول

***

نحن لو كان يوم سهينا مرة فى عمر الزمان

نحن عهدك مانسينا ولما حان يوم الآوان

جينا من غربتنا جينا وتانى لى نفس المكان

أتحدنا وبي أيدينا بنغسل الزل والهوان

***

وابدأ أفرح بيك واغازل

يا وطن بالعزة حافل

وافتخر بيك فى المحافل

وازرعك ورد وسنابل

يا وطن عارفك مناضل

والبخونك يبقى هازل

يبقى مكتول وابقى كاتل

***

وانظم الافراح نشيد

ما خلاص نادى المنادى

أتولد سودان جديد

أتولد سودان جديد

من طرف ود..نقد الأربعاء مايو 05, 2010 7:31 pm

الحب الكبير

الحان الموسيقار بشير عباس

اداء الفنان زيدان ابراهيم

يا بلادى الطيبة جيتك

عندى ليك كلام كتير

أصلى من بدرى أحتويتك

أنتى يا حبى الكبير

***

كنت قبل سنين طويلة

كنت زول هانى وغرير

وكانت الأيام جميلة

والبلاد مليانه خير

والوطن كلو القبيلة

غيرو ما بنرضى البديل

والنفوس كانت نبيلة

عامره بالحب الكبير

***

السنين لفت ودارت

وعجلة الدنيا بتدور

السنين كتبت وقالت

نحنا شعب صحيح جسور

ولو خطوب الدهر نالت

من صفاك لازم نثور

والبدور يزرع ويحصد

ما بيزع بالقشور

***

ما بلادنا الطيبة جنة

عامرة بالخيرات سخية

وأنتو طيبين يا أهلنا

بى خصال راسخة وقوية

لو قبيل كنا أنشغلنا

عن حبيبتنا الوفية

ليكى جابتنا المحنة

والعرق مهرك هدية

من طرف ود..نقد الأربعاء مايو 05, 2010 7:32 pm

قصر الشوق

الحان الموسيقار عمر الشاعر

اداء الفنان زيدان ابراهيم

باب الريدة وانسد

وقصر الشوق وأتهد

تمر أيام وتتعدى

ونقعد نحسب فى المدة

ومهما أجرب النسيان

الأقى الشوق بيمتده

****

وحات عمرا قضيتو معاك ،

محال عن ريدك أرتد

وراجى العين تلاقى العين

وأحضن أيدك البضة

وأهى الأيام بتتعدى

ونتعاتب ونرجع تانى لابد

***

يا قصر الشوق لو هداك حبيك

ومرة ليك صد

ببنيك بغلاوة الريد ..

محال أنا قصرى ينهد

واهى الايام بتتعدى

ونتعاتب ونرجع تانى لابد

****

أقول أصبر على الحرمان

أقول أنساك لابد

أشوف بس طرفك النعسان

تخونى القوة والشدة

وأصبر قلبى .. على الهجران

يثور ماضينا ويتحدى

وأهى الأيام بتتعدى ونرجع تانى لابد

من طرف ود..نقد الأربعاء مايو 05, 2010 7:34 pm

الياسمين

الحان واداء الفنان ابراهيم حسين

معزورين ، ولو عارفين حكايتى معاهو ،

تعزرونى لانو الما سقا الياسمين

ما بعرف غلاوة الند

ولا بعرف نداوة خد

ولا بعرف كلام العين .. ومعزورين

أريتكم مرة مرة شفتونى

وبينى وبينو بس خطوات

زى عابد وقف بيأدى فى صلوات ..

وزى والد همس لى جناهو بى دعوات

قولو على لو قايلين ..

معزورين ، وما عارفين

لانو الماسقا الياسمين

ما بعرف غلاوة الند

ولا بعرف نداوة خد

وما بعرف كلام العين .. معزورين

منو الفيكم بساهر الليل

يبارى سحابة لما تشيل

ويتبع نجمة ضواية مداها بعيد بعيد بلحيل

وقولو على لو قايلين

معزورين وما عارفين

لانو الما سقا الياسمين ،

ما بعرف نداوة خد

وما بعرف غلاوة الند

ولا يعرف كلام العين

من طرف ود..نقد الأربعاء مايو 05, 2010 7:36 pm

واحشنى

الحان واداء الفنان ابو عركى البخيت

واحشنى يا الخليت ملامحك ..

فى حياتى ،

واحشنى يا الرسيت مراسيك ..

جوة ذاتى ،

الا باكر لما ترجع ،

أنا بحكى ليك عن الحصل ،

وعن بعد المسافة وقربها

ولمن يفارق زول عيون

غاليات عليهو كتير خلاص وبحبها

والله أحكام يا قدر

والله أحكام يا مسافة ويا سفر

***

وانت لما بتسيبنى وتسافر

خت فى إعتبارك ،

انو دنياى فى مدارك

وجد- لفافات الصبر دخنتها

وكل المقاطع فى غناى طوعتها

وغريبة غنت ،

فرحة ... لا ... لا

غربة ..لا....لا

تقصد شنو ما عرفتها

وأهى تجربة .....

خطيرة – جد – وأجتزتها

ولسة واحشنى

من طرف ود..نقد الأربعاء مايو 05, 2010 7:37 pm

حبايبنا

الحان الموسيقار بشير عباس

حبايبنا

قرايبنا .. وتخاصمونا

وخصامكم لما زاد طول

ولمن أنتو فى الأول جرحتونا

قلنا أقلو نتلاقى

تعاتبونا...

تلومونا....

وفى الأخر تصالحونا .. حبايبنا

تغلطوا انتو ونسامح

ما بنقدر نخاصمكم

ما اصلو الهوى الجامح

بينسينا الخصام كلو

ويهون ظلم الهوى وذلو

والضقناهو من مرو

لما عيونك الحلوين تصابحنا

نرجع نحن مجبورين

نسامحكم ..... حبايبنا

ولمن زاد خصامكم لينا فات حدو

والقايلنو ببقى هظار

أسفر لينا عن جدو

بحر ريدكم وانتو بعاد

يوماتى بيزيد حدو

ولما عيونك الحلوين تصابحنا

نرجع نحن مجبورين ،

نسامحكم .... حبايبنا

وقرايبنا ،

وتخاصونا

من طرف ود..نقد الأربعاء مايو 05, 2010 7:39 pm

تباريح الهوى

ده الجانى منك ومن تباريح الهوى ،

وصفو بصعب يا جميل

وبعدت عنك ، ولما طال بى النوى ،

بقى لى أسيبك مستحيل ،

تبقى سيرتك هى الكلام

وتبقى صورتك هى الرؤى الحلوة البعيشها

فى صحوتى ، او حتى فى عز المنام

ويبقى اسمك هو الغنا

هو البجفف لى عذابات الضنى

ما الشفتو منك يا منى الروح يا أنا ،

وصفو بصعب يا جميل ....

وبعدت عنك .... ولما طال بى النوى

بقى لى أسيبك مستحيل

***

بشكى ليكم يا مظاليم الهوى

أصلى مجروح مرتين ،

يمكن القى الزيى فيكم

ضاق جراح الحب ومتعذب سنين

ويمكن القى وصفة تنفع ..

ولا يمكن القى حاجة تخفف الجرح القديم ..

حاجة تشفع ..

**

ده الجاني منك ومن تباريح الهوى

وصفو بصعب يا جميل

وبعدت عنك ، ولما طال بي النوى

بقى لى أسيبك مستحيل

من طرف ود..نقد الأربعاء مايو 05, 2010 7:41 pm

فات الأوان

الحان الشاعر... اداء الفنان عبد الوهاب الصادق

من بعد ما فات الأوان ،

الليلة جاى بتعتذر ...

بترجع أيامنا الزمان ،

من وين نجيب ليك العمر ؟؟

**

وفرحت بيك .. مديت دروب الريد سماح

وغزلت ليك ، طيبة مشاعرى غطا ووشاح ..

لكنى وآضيعة رجاى

رديتنى مكسور الجناح ..

وسقيتني بعد الحلوة مر

من وين أجيب ليك العمر؟؟

يا البى غرورك كم قسيت

كان ظنى فيك تكون حنين ..

غالبت أحزاني ومشيت ..

فى سكة الشوق بالسنين

وبراى بالنار انكويت

وصليتني بعد الفرقة بين

لحد ما كمل الصبر

من وين أجيب ليك العمر؟؟

من طرف ود..نقد الأربعاء مايو 05, 2010 7:43 pm

شقا الأيام

الحان الموسيقار عمر الشاعر

اداء الفنان زيدان ابراهيم

شقا الأيام ..

وسهر الليل ..

بهون لو مرة حسيت بى ..

يزول كل الوجع وأرتاح ..

وأغرد زى كنار صداح ..

وتبقى الدنيا فى عينى ...

أزاهر وغيمة وردية ..

ولو سلمت مرة على ..

سلامك ليا عيديه...

**

شقا الأيام وسهر الليل ..

وآهاتى الحزاينية ..

ملازمنى من يوم شفت عيونك الحلوة ..

ويومها عرفت كيف العين

مكامن ريد..

وجرة نمة من دوبيت ..

ضراعة فاتحة يوم العيد

فرح أطفال

وأهازيج زار

ونقرة طار ..

وبحة ناى ...

حزين غناى ..

ترانيم غنوة دينية

**

براى ... والليل

وأهاتى الحزاينية ،

بيغشاني النعاس مرات ..

وطيفك يمر..

يغافلني..

يبدل حزني اشراقات

وأبداء معاك غناوى الليل

وأغالب الدمعة مابيه تسيل ..

أتارى الليل كمل كلو ؟!

عيونك مرة لو طلو ..

يزول كل الوجع وأرتاح...

وأغرد زى كنار صداح..

وتبقى الدنيا فى عينى ..

أزاهر وغيمة وردية ..

ولو سلمت مرة على ..

سلامك ليا عيدية ..

من طرف ود..نقد الأربعاء مايو 05, 2010 7:45 pm

الماضى

الحان الشاعر .. اداء الفنان كمال ترباس

وجايى تفتش الماضى ؟

خلاص الماضى ولىَّ زمان ،

وجفت مقلتى الباكية ..

ونامت من سنين أحزان ،

وجاى تفتش الماضى ؟

**

أرجع بالزمن مرة وأتذكر حكايتى معاك ..

تلاقى القصة – جد – مره

هل راعيت شعور مضناك؟!

كلما تزيدنى فى هجرك

أقول ليك زيدنى ما أحلاك

لا شفع التوسل فيك .. ولا حرمانى يوم هماك

وجاى تفتش الماضى ؟

وجيت تترجى بالدمعات...

أسامحك أنسى أغفر ليك ؟

جفف دمعك الغالى ..

مسامحك وما عشان عينيك..

عشان تتعلم الغفران..

وتصفح لو زمن جار بيك

وحاول لو قدرت كمان

تقدر رقة الحابيك

وجاى تفتش الماضى ؟

وعزة نفسى مابيه على

أسلم قلبى ليك تانى..

سنين الهجر بيناتنا

وحاجات تانية حاميانى

ولو رجع الحنين وعاود

وليك من تانى ودانى

ولو مكتوب ليَّا تانى أحب

بحب إنسان يكون تانى

من طرف ود..نقد الأربعاء مايو 05, 2010 7:47 pm

أظلم من ظلم

ألحان الشاعر... أداء الفنان : كمال ترباس

كم شفت من مجهول مصير

وشفت ياما شفت كم

انا شفت ناس ظالمين كثير

بس أنت أظلم من ظلم

انا تانى ما بندم عليك

اصلو الندم بيفيد شنو ؟!

ولمتين انا اترجى فيك

الزيى كان رادك منو ؟!

لكن طباعك يا ضنين

لكن طباعك ما بتلين

جفوة ونفور وعذاب وسنين

وعمرو قلبك ما رحم

انا شفت ناس ظالمين كثير

بس انت اظلم من ظلم

**

يا دنيا ياما فيك ناس

بتقابل الريد بالجفا

يا دنيا ياما فيكى ناس

اتعلمت قل الوفا

ويا دنيا ياما فيكى ياما

وياما فيكى وبس كفى

آه من جفاك .. خليت شنو

انا شان رضاك

يا العمرو قلبك ما رحم

انا شفت ناس ظالمين كثير

بس انت اظلم من ظلم

من طرف ود..نقد الأربعاء مايو 05, 2010 7:49 pm

والله ايام يا زمان

اداء الراحل المقيم مصطفى سيد أحمد

والله ايام يا زمان

ببكى وبتحسر عليك وما بقول العشنا ، كان

وارمى حبة لومى فيك

ولسه راجيك يا زمان

بى حبة الذكرى المعاى

عايشة فى وجدانى لسه

جوه بتدغدغ حشاى

يمكن الحبيتو مرة

يلقى فى كلمات غناى

فاصلة بتصحى المشاعر

وجايز الطول سهادو

تغشى ليلاتو البشاير

ويمكن الفرح الزمان

باقى اصداهو بترن

غنوة حاضانها الضفاير

والله ايام يا زمان

**

جايز الايام تحن

وتصحى فيك نبض المشاعر

ويمكن المجروح يئن

تغشى ليلاتو البشاير

ويمكن الفرح الزمان

باقى اصداهو بترن

غنوة حاضناها الضفاير

والله ايام يا زمان

روائع الشاعر السوداني.. التيجاني حاج موسى!!!

روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!

رد: روائع الشاعر السوداني.. التيجاني حاج موسى!!!