روائع الشاعر السوداني.. صلاح حاج سعيد!!!

من طرف ود..نقد الخميس مايو 06, 2010 10:32 pm

الشجن الاليم - كلمات صلاح حاج سعيد

عارفنى منك لا الزمن يقدر يحولي قلبي عنك
لا المسافة ولا الخيال يشغلنى منك
*********
ببقى بعدك فى الأسى
وتبقى إنت الظالم .. القاسى .. النـِّسى
وغصب عنى أشيل ظنونى
وأقول عليك .. إنت المسامح
فوق شجونى أعيش زمان بالفرقة جارح
مافى إحتمالى وبالى إنـّكْ
إنت سايق فينى ظنك
رغم انك انت عارف انو منك
لا الزمن يقدر يحولي قلبي عنك
لا المسافة ولا الخيال يشغلنى منك
**********
تحرمنى منك والمواعيد لا بتجيب منـّك .. تودِّى
لا الشجن قادر قادر يشيلني عليك .. أعدِّى
لا التحايا ولا المشاعر الحيـّة فى عمق الحنايا
لا رسالة تجينى منـّك لا خبر طمنـِّى عنك
وإنت سايق فينى ظنك رغم إنك .. إنت عارف
إنـّو منك .. لا الزمن يقدر يحول قلبى عنك
لا المسافة ولا الخيال يشغلنى منك
********
يا هوى الألم النعيم
خليك على الوعد القديم
وخلينى فى الشجن الأليم
وأبقى فى كل المداين
سكتى .. وسفرى الجحيم
تبقى أيه الدني من بعدك .. تكون
وأبقى أيه بعدك .. أكون؟
مافى إحتمالى وبالى إنـّكْ
إنت سايق فينى ظنك
رغم انك انت عارف انو منك
لا الزمن يقدر يحولي قلبي عنك
لا المسافة ولا الخيال يشغلنى عنك
عارفنى منك ...

من طرف ود..نقد الخميس مايو 06, 2010 10:35 pm

المسافة - كلمات الشاعر صلاح حاج سعيد

لسة بيناتنا المسافة والعيون
واللهفة والخوف والسكون
رنة الحزن البخافها
تعدي بالفرحة وتفوت
وأبكي بالحسرة وأموت
*****
الأماني الفي السفر
قبل الزمن كايس المواني
يوم تجيبني عليك بصدق
إنو مرة الحظ طراني
واحتواني معاك شجن
عذبني قبلك ولسه منك جاي تاني
تمشي وين الخطوة منك
ما الزمن بالحب بلاك وابتلاني
*****
يا عيونك يا مدائن
الفرحة والحب والجسارة
عندي ليك مليون بشارة
ألف طيف والكلمة شارة
وأنت لما الحب يهون في عيوني
وفي عيونك يبقي حائر بالأمارة
الفرح منك يجيني
ويعتريني الخوف عليك
خطوة منك خطوة ليك
راجي منك بس إشارة
كلمة تديني البشارة
****
لسة بيناتنا المسافة والعيون
واللهفة والخوف والسكون
رنة الحزن البخافها
تعدي بالفرحة وتفوت
وأبكي بالحسرة وأموت

من طرف ود..نقد الخميس مايو 06, 2010 10:38 pm

الرسالة
صلاح حاج سعيد

الرسالة الحلوة ريدك ما بريدك
الخطاب النمقت كلماتوا إيدك
قبل ساعات قبل مدة
جاني مرسال المودة
ياما شال وقلبي أدى
إحتفلت وعمري عدى
كل كلمة بتكتبيها
يا حلوة إنت تنمقيها
تضوي بيها فرح عيونك
لوحه زاهية بترسميها
قبل ساعات قبل مدة
جاني مرسال المودة
ياما شلت وقلبي أدى
إحتفلت وعمري عدى
كل كلمة ندية واحة
كل همسه شجية راحه
والحقيقة الرائعة إنت
شن بدورك صورة بنت
شلت رسمك والأناقة
إنبهرت وغبت ساعة
يا ماهل وعما عيدك
ما بريدك وزي ريدك
الخطاب النمقت كلماتوا إيدك
قبل ساعات قبل مد

من طرف ود..نقد الخميس مايو 06, 2010 10:42 pm

صفوة محاسنك

كان نفسي أقولك من زمان …
بالكاتمو في سري ومكتم … في حشاي مدسوس سنين
كان نفسي أقولك من زمان
بالشايلو في عيني معزة وفي القلب … ريداً يخاف الغربة والشوق والحنين
زاملني زى خاطر الفرح … وكتين يقاسم الريد حنان
وكتين مدامعي تكون جزى … وتفتح مباهج الليل ظنون
كان نفسي أقولك من زمان
صفوة محاسنك عندي ما كثرة جفون …
وقت العيون تعبرني زي خاطر المساء
صفوة محاسنك ما الرخام الفي الحرير …
وقت الثغير يفجعني بي حـرفاً قسا
صفوة محاسنك عندي وقتين … كبريائك ينهزم لي طيبتي بلفظة حنان
وقتين مشاعرك تنسجم … في عمري تلفح قلبي بي رعشة أمان
صفوة محاسنك عندي وقتين شوقي …
صبح في هواك للعزة ما بتعرف هوان
كان نفسي أقولك من زمان
عينيك وحاتك دنيتي وأهلي … ودياري الفيها ضايع لي زمن
عينيك وحاتك شوقي لي زولاً … ولوف من بعد ساب عيني سهن
وأنا كنت داير من زمان … أشرح حكايتي معاك ألف
أحكيك وأزيد الكون ولف … وأتمنى لو قلبك عرف كان من زمان
من قبل ما في قلبي يتحكر … زمان الحرقه في جرح الأسى
من قبل ما حرف الحقيقة الحلوة يتبدل عسى
وأصبح أماني كثيرة في خاطر الحنان
كان نفسي اقولك من زمان

من طرف ود..نقد الخميس مايو 06, 2010 10:44 pm

الحزن النبيل
وبقيت أغني عليك
غناوي الحسرة والأسف الطويل
وعشان أجيب ليك الفرح
رضيان مشيت للمستحيل
ومعاك في آخر المدى
فتيني ياهجعة مواعيدي القبيل
بعتيني لي حضن الأسى
وسبتيني للحزن النبيل
* * * * *
ومشيت معاك كل الخطاوي الممكنة
وبقدر عليها وبعرفها
أوفيت وما قصرت في حقك ولا كان
عرفة غيرك أصادفها
وقدر هواك يجيبني ليك
جمع قلوبنا وولفها
وكتين بقيتي معاي في أعماقي
في أعماق مشاعري المرهفة
لا منك إبتدت الظروف
لا بيك إنتهت الأماني المترفه
* * * * *
ندمان أنا
أبداً وحاتك عمري ما شلت الندم
ما أصلوا حال الدنيا
تسرق مُنية في لحظة عشم
وأنا عندي ليك كان الفرح
رغم إحتمالي أساكي يا جرح الألم
كان خوفي منك جاي من لهفة خطاك على المواعيد الوهم
أهوه نحن في الآخر سوى
باعنا الهوى
ماشين على سكة عشم !!
وبقيت أغني عليك
عناوي الحسرة والأسف الطويل

من طرف ود..نقد الخميس مايو 06, 2010 10:45 pm

عينيك
عينيك مدن منسية
في كتب التواريخ والزمن
عينيك وطن مشدود
على وتر التباريح والشجن
ممدود على حروف الكتابة
مكدود عنا ومكتول صبابة
فيه حطّ النيل سكن
[ندعوك للتسجيل في المنتدى أو التعريف بنفسك لمعاينة هذه الصورة]
عينيك سفر مكتوب أعيش في غربته
واعشق عذابه وحرقته وليله الطويل
أتخيلك يا حلوة زي نسمة سحر
جيتي ومعاك حلمي المطول منتظر
وعدو الجميل
عشقك زمان جواي رحل
يتناها في الأعماق أمل
ضمخ رؤاي إحساس نبيل
أذهل طيوف خاطري القبيل
جاشت ملامح روعته
وضج السكون في وحشته
والكان أمل في عيوني لاح
زورق مدرات فرح الوهج النضير المزدهر
فجأة إنحصد قبضة رياح
وسكت الكلام يا حلوة في القول المباح
وقام الصباح بعدك رحل
والكان أمل في غيم سماك
أيقنت أنه عدم بلاك
وأنه البيحلم بي علاك
بختار ظروف أحلاها مُر

[ندعوك للتسجيل في المنتدى أو التعريف بنفسك لمعاينة هذه الصورة]
عينيكي لو تصدق معاي الأمنية
عينيك لو أعرف ختام الأغنية
بدأ الكلام والمنتهى والمستطاب والمشتهى
كل المباهج في المواويل والغناء
والعاشقين قلبي وأنا
هزتنا في عينيك تصاوير المنى
يا أمنيات من كم سنة
ويا أغنيات كل الأماسي المستحيلة وممكنة
المستحيل عينيك تهون
والمستحيل قلبك يخون
ما القدر ما طبع الوفاء والصدق ما شرط إنتفا
وأنا حالي في بعدك كفي
وأنا حالي من بعدك كفاهو
المغنى والحب والشجن
والوحشة والشوق للوطن
العمر قبلك ضاع سُداً
والعمر بعدك أية يكون
لو يبقى بي إحساس الزمن

من طرف ود..نقد الخميس مايو 06, 2010 10:47 pm

قـــمر الزمــان - الشاعر صلاح حاج سعيد

وكتبت ليك لا بيني بينك ريده لا قصة غرام
اخترت ليك اجمل حروف واصدق فواصل نادره في لغة الكلام
لا قصدي الهو معاك بي كلمات غنى
لا حروفي ليك مرجيحه من شعر الغمام
وكتبت ليك والله يا قمر الزمان
شان جيتي بي زمن المحنه
وشفت في عينيك حس اهلي القدام
وكتبت ليك وانا جاي من زمن الشقا
مرسوم على وش الثواني مظللا
تتمدد الساعات سنين
تتفتح الاحزان غريبه ومذهله
واشتاق افتش نسمه في الزمن العذاب
وايامي من كتر الاسى وكتر العزوف والاغتراب
صارت حروف مترهله
كلمات اسيفه ومهمله
وكتبت ليك وكتبت ليك
ووقفت ليك لامن لقيتك جاي في قلب الطريق
ولمحت فيك راحة المشاوير البعيده
ولفحة النسمه الحنينه الجاية من جوف المضيق
حسيت عجايب الدنيا اتلمت
بقت جاياني من عصر سحيق
عينيك حس اطفال بنادو القمره للغايب يعود
وجبينك الضواي حجا حبوبه في الزمن السعيد
يا قمره اقلبي السنسني الحمره شوفي ابوي جا وله ما جا
وانا في قساوه الزمن الموحش المكهرب بالحريق
انا حيلتي ايه انا حيلتي ايه قول لي يا قمر الزمان
غير اتكي واحلم معاك واحضن اماسي الصحو والامل البريق
قولي لي يا قمر الزمان انا حيلتي ايه قولي لي يا قمر الزمان

روائع الشاعر السوداني.. صلاح حاج سعيد!!!

روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!

رد: روائع الشاعر السوداني.. صلاح حاج سعيد!!!