لماذا الصمت....؟

الجميع في داخل السودان أو خارجه يعلم بالحال في السودان
غلاء معيشي فايت الحد...كل حاجة زايدة...والحاجة البتزعل الشعب ساكت
هل هذا الصمت عجز...ام خوف؟

عايزة أعرف وياريت زول يجاوب على السؤال المحيرني

الشعب السوداني فقد الوطنية وانكسر قلبه مع السلطة العسكرية التي تضع السلاح على عنق الذي يعلو صوته ومن يعبر عن رايه . لذا هذا السكوت والوجوم .
الكل يدري ما وصل اليه حالنا ولكن ...

أشكو إلى الله كما قد شكا أولاد يعقوب إلى يوسفي
قد مسني الضر وانا الذي تعلم حالي وترى موقفي
الحمد لله على كل حال
وأكيد ما بعد الشدة إلا الفرج
شكرا على المرور والتعليق عواطف كما عودتينا دوما

الما الليل الظالم طول
وفجر النور عن عينا اتحول
قلنا نعيد الماضى الاول
ماضى جدودنا الهزموا الباغى
وهدوا قلاع الظلم الطاغى

وف ليلة وكنا حشود بتصارع
عهد الظلم الشب حواجز شب موانع
جانا هتاف من عند الشارع
قسما قسما لن ننهار
طريق الثورة هدى الاحرار
والشارع ثار
غضب الامة اتمدد نار
والكل ياوطنى حشود ثوار

وهزمنا الليل

النور فى الاخر ..طل الدار
وهزمنا الليل والعزة
والعزة اخضرت بالاحرار

وكان القرشى شهيدنا الاول
وما تراجعنا
حلفنا نقاوم ليلنا وسرنا
وما اتراجعنا
نزرنا الروح
مسكنا دربنا
وما تراجعنا
للشمس النايرة قطعنا بحوور
حلفنا نموت او نلقى النور
وما تراجعنا
وهزمنا الليل


ياساحة القصر
ياحقل النار
ياساحة بتحضر روح نصار
سقينا ورودك دم ثوار
شتلنا فضاكى هتاف احرار
خطينا ترابك احرف نايرة
بتحكى سطور ايامنا الثايرة

الرصاص لن يفنينا
ازلنا موانع
كسرنا حواجز
وصفنا واحد
عامل وطالب
وصانع وزارع
الرصاص لن يفنينا


يا اكتوبر نحنا العشنا ثوانى زمان
فى قيود ومظالم وليل وهوان
كان فى نفوسنا غضب بركان
وكنا بنقسم بالأوطان
نسطر اسمك ياسودان


لما يطل فى فجرنا ظالم
نحمى شعار الثورة نقاوم
نحمى شعار الثورة الاكبر
ورسمو النادر وزاهى واخضر
نحمى شعار الثورة نقاوم
ولسة بنقسم يا اكتوبر
ونبقى صفوف صفوف
تمتد وتهدر
لما يعود الفجر الحالم

الاخت عاشقة طيبة
السلام عليك ورحمته وبركاته
الشعب السوداني هومن قاد ثورة اكتوبر خرج الطلاب من الجامعات وخرج الشعب واضحى القرشي شهيدنا وخرج الشعب
كل مافي الامران الشعب لم يكن يعاني كما الان
تخيلي معي اختي
عبد اللطيف رجل يبيع الخضار يعول اسره قوامها سبعه اشخاص يخرج في الصباح الباكر فيجد زحمة المواصلات يقاتل ويناضل ليجد مقعدا وربما شمع يصل الى السوق ويفرش خضاره وما ان يقول يالطيف حتى تداهمه الكشة فياخذ راس ماله ويجاهد مرة اخرى ليصنع راس مال جديد
ايعود الى البيت فيجد احمد ابنه مطرود في رسوم الجامعة ثم ياتي ابنه خالد مفصولا من الجامعه لانه قال لااااااااا للظلم
ويذهب الى الدكان لياتي برطل سكر فيجده قد زاد
من اين لهؤلاء اختي ان يتكلموا
لم يكن كل هؤلاء اشخاص حقيقين ولكن هذا لسان حال الشعب السوداني
لسنا جبناء ولم نكن يوما عاجزون ولكن شغلنا بالحياة
ولوان امثال عبد اللطيف صرخوا لما وجد ابناءهم طعاما يقتاتون عليه
واخر الكلام:
فتاح يا عليم رزاق يا كريم صلى على عجل

همهم همهمات

حصن للعباد وهوزز سبحتو ودنقر للتراب

هم فوق هم هما

صنقع للسما وكان في الجو في غيم

وكم نجمات بعاد .. وكان الدنيا صيف

لا قالتو كيف اصبحت كيف ..

لا لمست حنان ..

لا لمست وداد .. لا رمشة طريف

من قلب وفي زي ايام زمان ايام الدفي

كانت ماها في

كانت في المراح ..

شدتلو الحمار تحلب في الغنم ..

لــي شاي الصباح والطير ما نضم ..

ما رسل نغم ..

عم عبد الرحيم اتوكل نزل

في المشرع لقى زملان الشقا

الجا من الجريف ..

الجا من الجبل ..

عل الناس بخير ..

صبح هاظرهم نقنق ناقرهم وغاظوه ونعل

وعم عبد الرحيم ما بخبر زعل

كل الناس هنا ما بتخبر زعل

تزعل من منو وتزعل في شنو

كل الناس حنان .. كل الناس صحاب .. كل الناس اهل ..

والماهم قراب قربهم العمل

الطاق اليطق

عشت ابو الزمل بالحال العليك بالفال بالامل

عم عبد الرحيم .. كت فلاح في يوم على ايدك تنوم على كيفك تقوم

لا دفتر حضور لا حصة فطور تقرع بالقمر تزرع بالنجوم

لكن الزمن دوار لابدوم

عم عبد الرحيم ماشي على الشغل

في الباب القديم انعارض تكل

تنشايح جراح ياما كيف الغسل

الدنيا ام صلاح تبدأ من التكل

من حجة صباح في حق الملاح

في اللبس الجديد ..

في القسط القديم .. وبيناتن عشم

في الفرج البعيد ..

امونة الصباح .. قالتو النعال والطرقن هرن ..

ما قالتو جيب ..

شيلن يالحبيب قشهن النقلتي والترزي القريب

بس يا ام الحسن طقهن ما بفيد

وانطقن زمن وان طق الزمن لازمك توب جديد

بي أي تمن ...

غصبا للظروف والحال الحرن

عشان يوم الرحول ما تنكسفي يوم...

لو جاراتنا جن مارقات لي صفاح ..

او بيريك نجاح ..

دا الواجب اذن ..

وايه الدنيا غير .. لمت ناس في خير او ساعة حزن

عم عبد الرحيم ياحر ماك حر

ياريت التمر ياريت لو يشي لكل تلات اشر

ولا ايام زمان كانت ما تمر

كان ما جاك هوان ما لاقاك ضر

كان لا ضقت ضيق .. لا انغرغر الصبر لا شابيت غريق

لا طوح فقر ..

وكان ما كان وكان اكسيك در ..

حكومات تجي وحكومات تغور

تحكم بالحجي بالدجل الكجور

مرة العسكري كسار الجبور

يوم قسم النبي تحكمك القبور

تعرف ياصبي مرة تلف تدور

ولا تقول بري او تحرق بخور

هم يالفنجري يالجلف الصبور

كل السقتو ما باقي على التمور

وارضك راقدة بور..

لا تيراب وصل ..

لا بابور يدور ..

والماهية اف عيشة هاك وكف

في هذا الزمن تف يا دنيا تف

يالعبد الشقي ما اتعودت شكي

لكن الكفاف فوقك منتكي

والسوق فيك يسوق حالاً ما بتسر

الا كمان في ناس فايتاك بالصبر

ساكنين بالايجار ... لا طين لا تمر

واحدين بالايجار ما لاقين جحر

سلعتهم الضراع والعرق اليخر

عمال المدن .. كلات المواني .. الغبش التعاني ..

بحارة السفن .. حشاشة القصوب .. الجالبة الحبال ..

الفطن الفرن .. الشغلانتو نار والجو كيف سخن ..

فرق شتى بين ...

ناساً عيشا دين ...

مجرورة وتجر

تقدح بالاجر ومرة بلا اجر

عيشهم كمهو وديشهم هان قدر

وناساً حالا زين ..

مصنع مصنعين

طين في طين وين

ما مرابا مر بارد همها

لا بعرق جبين ولا وشا يصر

عين والله عين .. كلها كمها وعزها هان قدر

دي الجنة ام نعيم دي الجنة ام قصر يا عبد الرحيم الا ورا القبر

لا تسرح كتر فتاح يا عليم

وان كان الفقر يا عبد الرحيم اشبه بالكفر

حكومات تجي وحكومات تغور

تحكم بالحجي بالدجل الكجور

مرة العسكري كسار الجبور

يوم قسم النبي تحكمك القبور

تعرف ياصبي مرة تلف تدور

ولا تقول بري او تحرق بخور

هم يالفنجري يالجلف الصبور

كل السقتو ما باقي على التمور

وارضك راقدة بور..

لا تيراب وصل ..

لا بابور يدور ..

نقرض للحمار ...

نقريضة الحمار لا تنسي النعال

الطرق الخضار اللبس الجديد ..

تسريح السفر ..

للماشي الصعيد ماشي الديش نفر

والبال اشتغل ...

والبال اشتغل للابا ما يعيد الحول ما اشتغل

والبال اشتعل ...

السكة الحديد ياعمو القطر

ياعم عبد الرحيم قدامك قطر

وسال الدم مطر

وطارت دمعتين ونشايح وتر

ياطاحن الخبر ما بين القضا ومرحاقة القدر

الشدة ام دموع والدمع انهدر

ايدهم في التراب .. والعين في القطر

عارفين الحصل عارفين في حذر الخبر اليقين دوخ وانتشر

اطفال القرى وعمال الحضر

ادوهو الطيور ودنو البحر

انصاعد سحاب وندافق مطر

عم عبد الرحيم في الشارع عصر ..

للدار اليسار متفادي الكجر ..

عربية الكجر .. دورية الكجر ..

جفلت الحمار وطوح زي حجر ..

وعم عبد الرحيم اتلافا القطر ..

فتاح يا عليم سال الدم مطر ..

جرتق بالتراب منشور بكتاب

روشتة وجواب ماهية شهر

اورنيكين سهر جنب لبدة حمار مقطوعين ضهر

عم عبد الرحيم يا كمين بشر

صح الموت سلام ما يغشاك شر