تصور كيف يكون الحال لو ما كنتا سوداني

من طرف MONZER الخميس مايو 28, 2009 10:05 am

الشاعر : اسماعيل حسن

يا بلادي اهلا يا بلادي
صدورنا حماية ليك من الاعادي
بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخضر في بلادي سلام ..
خضرة شاربي موية النيل ..
تزرد في البوادي زرع
بلادي سهول بلادي حقول بلادي الجنة للشافوها
او للبره بيها سمع
بلاد ناس تكرم الضيف
وحتى الطير يجيها جيعان
من اطراف تقيه شبع
تشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكندل في طريفو ودع ،،
بلادي بلاد من التاريخ
من ترهاقا لعند ميسنا
حتى الجاي خيل ودروع
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره
وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي ، لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا، معايا زي ضلى
لو ما جيت من زي ديل..
كان ،أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف يكون الحال لو ما كنت سوداني واهل الحاره مااهلي؟

من طرف وجدان الخميس مايو 28, 2009 11:00 am

لو ما كنت سوداني طبعاً ما بتمنى أن أكون أمريكي أو إنجليزية أو .......... الخ

من طرف ابوفدوى الخميس مايو 28, 2009 5:26 pm

احييك يا اخ منزر على هذا الاختيار الموفق جداًً
شولة
نبلو يطلع ذى شعاع
لا ولولا لا شيل ندامة
امتنانى
ابوفدوى

من طرف MONZER الجمعة مايو 29, 2009 4:44 pm

لكم الف شكر .. وجدان .. & .. ابو فدوى .. لمروركم الرائع ..

من طرف ابو لين السبت مايو 30, 2009 4:12 pm

وتقاقيبهم تسرج الليل مع الحيران

والله يا منذر يا ريت لوتستمر فى اتحافنا بهذه الروائع المليئة بالمعانى التى كادت ان تندثر مثل
تقاقيبهم والتقابة هى نار توقد بالليل يستفيد طلاب الخلاوى من ضوءها لقراءة القران
ما اجمل هذا الرائع حين يقول

بلاد ناس تكرم الضيف
وحتى الطير يجيها جيعان
من اطراف تقيه شبع

وكم نخلات تهبهب فوق جروف الساب
وبقرة حلوبة تتضرع وليها ضرع

بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،

ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،

تصور كيف يكون الحال لو ما كنتا سوداني

تصور كيف يكون الحال لو ما كنتا سوداني

رد: تصور كيف يكون الحال لو ما كنتا سوداني

رد: تصور كيف يكون الحال لو ما كنتا سوداني

رد: تصور كيف يكون الحال لو ما كنتا سوداني

رد: تصور كيف يكون الحال لو ما كنتا سوداني