من أمس الحركة الثقافية في الدناقلة (الصيف التالي)

مسرحية المك نمر أخرجت في السودان على يد عمالقة المسرح وتم عرضها في أكثر من مكان وأزمنة مختلفة ، لكن لها عندنا في الدناقلة طعم خاص في الذاكرة للأحداث التي تزامنت معها ، يقال أنهها أديت قبل جيلنا وقد أدى عثمان مساعد له واسع الرحمة دور طه وأجاده رغم أني غير متأكد من المعلومتين لكن هكذا رسخت عندنا في ذلك الوقت الشيء الذي جعلنا نهاب القيام بدور طه وصادف أن شرفنا في ذلك الوقت الأخ عبد الرحمن الأمين صالح ووقتها المركز الحالي لم يحتفل بعامه الأول ووافق على عرض الحضور بالقيام بدور طه ولكنه ذهب لأم درمان للعزاء في وفاة العم حسن سعيد له واسع الرحمة ولم يعد عبد الرحمن أو يعتذر وحتى يتم حفظ المسرحية كان كل صاحب دور يؤدي دوره ويسند دور طه لأي واحد يقرأه وكنت أقوم بدور الملقن ووجدت نفسي أحفظ الدور مضطرا وأديته.
تم عرض المسرحية بالدناقلة واتفقنا مع أهلنا في القوز بعرضها لهم وذهبت بمعية الأخ يس مبارك للتصديق من الضابط التنفيذي لمجلس ريفي الحوش – أحمد شيخ إدريس مناع- ومنحنا التصديق وجهزنا التذاكر. كانت عادة أهل القرى أن يستلموا التذاكر ويوزعوها بمعرفتهم لأهل القرية ويكرمونا غاية الكرم. ونحن نستعد للسفر للقوز توفي العم محمد حسين حاج بشير له واسع الرحمة وحدث انقلاب هاشم العطا في نفس الأيام وكان الفراش كله نقاش ما بين مؤيد ومعارض للانقلاب حتى كبار السن قالوا كلاما صعبا ومن الشباب في ذلك الوقت أخذ الأخ عبد العزيز قسم وحسن عمر موقف المؤيد للانقلابيين والأخ بشير الجعلي وعبد الباقي يوسف المؤيديين للنميري والبقية لم تفصح. ركبنا لوري الأمين خالد أطال الله في عمره متجهين جنوبا صوب القوز وعند وصولنا الشبارقة وجدنا شباب يهتفون بهتاف المذياع عائد عائد يا نميري وهنا هلل بشير وعبد الباقي والذين أقنعناهما بصعوبة وتأكد لنا قيامهما بأدوارهما لكن من الجانب الآخر عبد العزيز قسم وحسن عمر استلما دور الرافضين حزنا على نهاية حركة هاشم العطا ومرة أخرى دخلنا في معركة الإقناع والأجاويد ويا جماعة نحن كدا نحرج مع ناس القوز وتعبهم وتحضيراتهم وفي النهاية لعنوا إبليس وواصلنا المشوار للقوز والتي احترمنا أهلها بكرم فياض عشاءا وتذاكرا كان عائدها دعم للمرحلة الثانية من تجهيزات المركز.
لا أطيل وأترككم مع قصة وأحداث المسرحية:

قصة هذه المسرحية سردت بأكثر من صورة ولكنها كلها اتفقت في الآتي:

1. تأريخ الحادثة وهو عام 1818 ميلادية.
2. تأكيد أن رجل من فرسان البطاحين قد قتل حمد ود دكين زعيم الشكرية.
3. اللجوء لأرض الجعليين وطلب الحماية من المك نمر.
4. الحكمة التي تمت بها معالجة القضية بين القبائل.
5. المعلجة الشعرية المتميزة من الشاعر الكبير ابراهيم العبادي.

الروايات المختلفة للواقعة:
تروي الروايات ان هذه الواقعة وقعت حوالي عام 1818 ميلادية وكانت الواقعة الشهيرة أن قتل احد فرسان البطاحين حمد ود دكين زعيم الشكرية واحتمي البطاحين بأبناء عمومتهم الجعلين وعلي رأسهم المك نمر وكادت الحرب تقع بينهم ولكنها انتهت إلي الصلح
وصور الشاعر الكبير إبراهيم العبادي هذه الواقعة مع اضافات أدبيه جمة ومحسنات أفضت بها إلي مسرحية شعرية بقت اثر عظيم لتلك الواقعة التي تناسي التاريخ سببها الاصلي وبقيت ابيات الشعر والحان القوافي



ورواية أخرى تقول بأن فتنة الجعليين والشكرية وقعت عام 1818 عندما زاد النيل زيادة عظيمة فهدم حله البشاقرة بالشرق ، وقد عرف ذلك النيل بنيل حمد ود ابسن الذي قتله البطاحيون .
والقصة انه ذهب حمد ود عوض الكريم ود ابو سن ليزور اخواله البشاريين في عدد من أصحابه وفي الطريق داهمه علي ود برير البطحاني الهمباتي المصمم علي قتل حمد لثأر بين القبيلتين ، و تبارزا وعرف عن حمد قدرة وإتقان في الاتقاء بالدرقة ، وأدرك ود برير انه سيخيب في اختراق هذا الفن المتقن ، فصاح بحمد يهزء ( الليلة يا شيخ العرب تجلع مثل العروس في الرقص ) فرمي حمد درعه ، وعاجله ود برير وقتله

وفي رواية أخرى وردت القصة كالآتي:-
طه يحب بنت عمه ريه وخطبها وهم من قبيلة البطاحين.
وأن حمد ود دكين شيخ العرب من قبيلة الشكرية رأى ريه مرة وأعجبته وقال أنه يود خطبتها لكن عندما قيل له أنها مخطوبة من طه غضب واختلف هو وطه والبطاحين قالوا لطه اترك ريه تفاديا لغضب ود دكين لكن طه الفارس رفض المفاوضة
وأخذ ريه وقال متوجها للمك نمر شيال التقيلة وفي الطريق لحق به ود دكين ومعه جماعة مؤجرهم (مرتزقة) حتى يقاتلوا معه وقال لطه أحسن تترك ريه وأعطيك أي شئ تطلبه. طه رفض وتبارز طه وود دكين انتهت بقطع رأس ود دكين ووصول طه لشندي تحت حماية المك نمر بالرغم من أن ود دكين نسيبه عم زوجته شمة بت عبد الله ود دكين.
قام الشكرية بلحاق طه عند المك نمر وقالوا للمك نمر أعطينا طه أو نحارب ورفض المك نمر أن يسلمهم طه
وإستعدوا للقتال إلا أن شمة زوجة المك نمر كانت حكيمة وذكية أرسلت في طلب رجل يدعي ود النعيسان كان داهية في حل المشاكل وقام بحل المشكلة وقام تحالف بين قبيلة الجعليين والبطاحين والشكرية.
طه :
أخوك يا ريا وكت الخيول بدبكن
أخوك يا ريا وكت الرماح يتشبكن
أخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا :
وراك أسود علي ما نمت اسع طيب

طه :
بسم الله قولي أخو طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب

الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس أنا ما بخافو لقاهو
ياليت الحلم في صحيا كان بلقاهو
قالت ريا :
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه
طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه
قالت ريا:
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها
وقعدت ريا تبكي:
رد عليها طه وقال :
ما بفيد البكاء وكلامي احسن تنسي
قالت ريا :
كيف ما أبكي وكيف أفوت مراتع أنسي
افقد كل شي عزي ورجالي وانسي
تطلق فوقي نار عقبان تقول لي أنسي

كنا في سيرة لقاء طه وريا وهم بيحكوا لي بعض قصة الحلم

طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت
قالت ريا :
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك
طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول
قالت ريا :
وريني الحلم التورك مذهول
طه :
أصبري لي أروق حبل الفكر مبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كور صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن
قالت له ريا :
عارض ومات خلاص لي الليلة يمكن عفن

بعد ان بدأ طه يطمئن ريا اراد ان يقطع الشكوك
والمخاوف من تحقق هذا الحلم بالزواج من بنت عمه ريا
طه :
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه

طبعاً ريا ما قبلت الكلام ده لانو ابوها عبد الله المعروف بابو كبس
ما تمّ سنه من وفاته والناس في حالة حداد
قالت ريا :
ده الاعوج تراه والشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو

إن كان في الفريق ماتت مريه ذليله
لي الحول يرفعوا العرس الدخلتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال
طه :
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً تجي الفترانا
هادة الحد ندوس والناس عقب تبرانا

بعدين ريا شافت تحسم موضوع العرس ده مع طه
وانه لازم يتم السنة كالعادة المتعارف عليها في الحداد :
ريا :
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم
طه :
تاني امضي حول وانا بالحسا اتالم
علي حكمك صعب انا قابله ما بظلم
نستني السنة قاسية وصعيبه علينا
ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

وتقوم ريا فايته علي الفريق وطه يعاين فيها وهي ماشه
ويقول :
ياليت السعادة ان كان وقت ايديه
كنت اعيش غني في الدنيا بالزنديه
علي حكموا ناسي الفب اخذوا الديه
اموت بالعطش والمويه بين ايديا
اه يا رب ارحم صبري امس ضنين
يمحف ديه السنه ربي الحليم وحنين
يخصمه من حياتي رضيت بعشرة سنين



و ريا داخله علي الفريق
لاقوها خمسة عرب راكبين زوامل
" ودي بداية الحلم الشافتوا ريا وشافوا طه "
العرب قربوا من ريا قام واحد من العربان المع ود دكين
شيخ العرب نادي ريا
وقال : بالضيفان تمري لا لام لا كلام
صدقوا اهل المثل توب العرب صح لام

قامت ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف

قام العربي قال ليها :
من وين في الاهل كفاك فخر يا بنية

ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه

قام رد عليها ود دكين طبعاً عرفها
انها هي زولتوا العاوز يعرسا زاته
فقال :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله :
كما يسد مكانن قدموا ليش يوطاها
( يعني ماشي في الواطه ليشنو
غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه

رد عليها و دكين :
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المطريه

قام واحد من العرب داير يعرفا انه
ده شيخ العرب ود دكين فقال :
ما بتسألي لامن وين ولا وين ترسو

قالتلوا ريا :
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا

فرد عليه العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه

ده خريف البطانه المالوا فيها مشارك
هيلوا السارحه هيلوا الصاهله هيلوا البارك
ما وقع لك كلامي ساكته لي شنو خبارك
فخرك ود دكين جاك في فريقك زارك

ردت عليه ريا :
اهلا حبابو العزو ماهو لفايه
اب ناراً تولع للضيوف دفايه
بي شيخ العرب الإفتخار ما كفايه
تابعو إنت جانا نجري ونخدموا حفايه

رد عليها ود دكين :
بارك ربي فيك عقلك يدوم يا ريا
كرمك ماهو كلفه ديه طبعتك فطريه
إياك بت التلوب والسمته فيك محريه
قديم فوت البطاحين عزه للشكريه


جاء طه ولقاهم واقفين قال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدرنا
تنزلوا في الدرب مالنا ماتت نارنا

رد عليه شيخ العرب:
حباب طه الضرس والفي الصهيباب راس
الجود والكرم يلك قديم ميراس
نارك ما بتموت با ولده الفراس
قاصدين ام شديد ومعانا عوجه راس

رد طه :
لعدوك العوج يا الفي الكبس سراي
راسك ما بدوس مليان رجاله وراي
باكر لي ام شديد اركب معاك براي
يا شيخ العرب لاكن تختوا كراى

طبعاً شيخ العرب ما فهم كلمة كراى ديه فقال لطه :
هادي الشورة يا طه الغلبني دليله
كل البزمه القاهو فيك قليله
رد عليه طه شارح ليه كلمة كراي :
كراي الدايروا تبقوا ضيوفنا انتو الليلة
ترقدوا في الفريق حتي ان عشانا بليله
رد عليه ود دكين :
مسكنا الدرب أسرع قوام ما تلعب
دارك ديمه عامره والسمح ما بكعب
يكفين الوصف لاتشد جمل لا تتعب
وهدنا الطريق عقب الوصول ما بصعب
رد طه:
يمين تغشوا الفريق بتفوتوا نحنا مقابر
رد عليه شيخ العرب :
عامر انشاء الله ديمه اياك مرسى العابر
مشطوطين خلاص مسكنا في دريب جابر
نخاف عوج الطريق منو لي المقدر خابر
رد طه :
دريب جابر مزم والسكه سالكه ورايقه
فرقان ما بتلاقيك ما بتعوقك عايقه
اخذ خاترنا نحنا قالوا واصله السايقه
بتراوح ام شديد باكر زواملك فايقه
رد عليه ود دكين :
الزول ان وعد شين ميعادو يخلفو
في ربط اللسان يسخابو دمو يتلفو
سفري الليله فيه زولين ما بختلفو
ضروري اصل ام شديده علي وعد بي حلفو
ما بعرف ازوق من نشيت تبيت
فريقكم لي فريق وبيتكم يمين لي بيت
اجيك ديناً علي حتي إن بقيت حبيت
هاك وعداُ نجيض ارجانا بكره مبيت
شوفتي للفريق ايام بكي ابواتك
ما غابني حالك سمعت بي نخواتك
فريقك بكره ضيفوا وما بفوتوا وحاتك
إلا أحققك وبراي اشوف نفحاتك
يا ود الهميم النفسوا ما معارضاه
كرم الضيف عليك مكانه ابوك فارضاه
جاييك في امر ان تابه وان ترضاه
غيرك ما بكوس واملي بس تقضاه
رد طه :
غرضك مقضي كان احتاج لخيل وجمال
والضان والابل سارح يمين وشمال
رد عليه ود دكين :
فوق القولتو انا لي فيك امال
رد طه:
بي دمي الغرض اقضاهو خلي المال

المهم طه زي فهم شيخ العرب
وده ماشيلوا جاي وطه ماشيلوا علي المال
فرد عليه شيخ العرب :
دي المأموله فيك وين الدرب خترنا
رد طه :
دربكم في السلم
قالوا شيخ العرب :
والله تب ما ودرنا
بكره نجيك ان قلينا ولا كترنا

وهنا ودعهم شيخ العرب وسار بي جماعته قاصد ام شديد وعلي
اساس في اليوم التاني ينزل ضيف علي طه وقبيلة البطاحين

وفي اليوم التالي طلع طه مع ريا منتظرين ود دكين
حسب موعده معاهم وفي الحديث
قال لي ريا :
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شئ ما شوفتي كيف مرعوب
حمد ود دكين مرتع دياروا وربعوا
ده الشئ السمعتوا من الاباه والتبعو
الراجل فاعيلوا يبين لك طبعوا
انا ود الخلا البعرف اسوده وضبعو
ردت ريا :
اعوج كان يخلف الليله ميعاد جيتو
رجال وحريم كل اهل الفريق في رجيتو
قطعوا السارحه كل زول في مراحو سعيتو
كبار وصغار و حتي الراعي خله رعيتو
قال ليها طه :
محال يخلف محال قال جايبو غرضاً عندي
ردت عليه ريا :
كان غرضاُ صعب ؟؟؟؟؟
رد طه :
كان رأس نمر في شندي
وعدتوا أقضاه وابذل كل جهدي العندي
كان بالمال وكان بالراى وكان بي زندي
قالت ريا :
هيلك من زمان غنت البجيك تحجالوا
لاكين ود دكين عامر قديم برجالو
قال ليها طه :
يا ريا الكلام ده اخير تقفلي مجالو
وكت اوعدته بقضالو غرضو الجالو

وفي وقفه طه وريا يجوهم ثلاثه من ابناء
البطاحين عبدالله وخلف الله و أحمد

قال عبد الله :
سلام يا طه
قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعى هزي
وإن زحينا يوم الحارة قرنك جزي
ردت عليه ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ما هيلم تزحوا غن كان يزح الداير

قام خلف الله لما سمع الكلام ده خاف
وارتجف واصابته خوفه كده فناداه
عبدالله قال :
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد أتمني أسمع نمك
فرج همنا مولاي يفرج همك
دوبينا ......قول ... دوبينا
قال خلف الله :
الولد البخاف من القبيلة تلومو
بخلف ساقوا فوق تيساً رقيق قدومو
اما يجيب رضوه البهم البينقر فومو
وإما تخامشن قدح الرماد حرومو
سنابك حضر الطافه و جرايدك نوا
كورك سال و مزيقا و رطانه و عوا
الخلاني فوق نار أم لهيب أتلوي
النوم شفتو يا قرد القلوع شن سوا
أكل الشلخه لامن كمل المنسية
شمخ الحورى لبعصه عريب بت ريه
أكان ما أسكت الباكيات و أخلف الكيه
قوله أبو فاطنه يا الصادق خساره عليا
خرير دوماتو فوق عاجن رسن متلاقيه
يا الغول النقيب سويلو سوق الساقيه
بت معز الخلا الفوق الكجر متاقيه
عكرناها يا أمروبه النشوف الباقيه

ظهر ود دكين في جماعته جايين علي الفريق

فقال طه :
هداك ود دكين بي زمله بان شفناه
دار اليوم يروح خلف الوعد خفناه
الراجل في الاصول ما خاتي لي معناه
يا ريه استعدي الزول جمعنا عناه
ولما وصلوهم ود دكين
قال :
قلنا جاهم شيخ العرب
فقال:
ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره

رد عليه طه :
مرحبتين حباب مرحب خريف الرازه
حباب شيخ العرب البيه القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه
قام عبد الله قال : هيا جايهو الزمل
رد شيخ العرب :
خليه يا عبد الله
غرضي إن كان ما أنقضى أنا زملي ما بتدله
رد عيه طه :
الناس في رجاك من الصباح في مله
كدي شوف الطعام شيخ العرب بسم الله
رد شيخ العرب :
ما بأكل طعام كان ما حساب اتضرب
وقضيان الغرض فيكم حقيقه مجرب
الامر العنيتو كما اتدرب
ما بنفعني اكل وما بيرويني مهما اشرب