وصايا الحب السبعة

من طرف امين كمبوني السبت أكتوبر 04, 2008 2:29 pm

لست بالباحث او المتخصص العاطفي لوضع هذه الوصايا انما هي نابعة من تجارب و معايشات سابقة اكسبتني الخبرة الكافية لوضعها..
وتقتصر هذه الوصايا للجنس الخشن فقط و لا دخل للجنس الاخر بها و بقول للبنات don’t even try it
عشان ما ندخل في اماكن ضيقة و الدواء الما ليك ما تجربو..
و بلا نقول بسم الله و ندخل لوصايانا :
• اولا : البت البتلاقيها في المواصلات او في حفلة او رحلة....الخو ترمقك بالنظرات و شوية تلميح بالكلام و شوية موعد و بعدو لقاء , ما تتعلق بيها شديد !! و اكيد الشمار حيخليك تسألني ليه..؟ اقول ليك ببساطة لانها ممكن تعمل كدا مع اي واحد غيرك لانها جريئة و ما فيها حمرة الخجلة و هي البت شنو غير عزة نفسها..؟
• ثانيا : ما ذكر انفا عن البت الجريئة ما كل شيئ و حتقوم تخلي اللقاءات تتكرر و كل مرة في مكان مختلف من اختيارها و اذا انت المسكين سالتها عن لماذا اخترتي هذا المكان ترد عليك لانو بعيد عن البيت او لانو مكان هادي., لكن لا يالفالح هي عملت كدا عشان المكان هاي كلاس و فيهو ما لذ و طاب من الاطعمة و المشروبات الما بتشوفها الا في الدعايات و الوجبة بالشيء الفلاني و حق الوجبة الواحدة ممكن يمسك ليهو بيت اسبوع كامل او شهر اذا لم ابالغ....
• ثالثا : عليك الله يا حبيبي انا بكرة عندي محاضرة بدري شوية فلو امكن تجي تسوقني بالعربية بتاعتك لانو المواصلات زحمة خالص ... وانت طبعا ما مصدق لانها جات منها و تقوم جري علي قصر الاليزيه اقصد بيت الحنان وخطواتك اقصد اطارات سيارتك تسابق الريح الي هناك لكن مهلا ( خفف السرعة اهلك في انتظارك)
• رابعا : يا عمري طبعا انت عارف انو ماما في الاردن بتتعالج و انا لي فترة ما اتكلمت معاها و عاوزة اطمن عليها بس الجوال رصيدو مصفر و ما عارفة اعمل شنو ..؟و انت نظام الواد شهم و كدا تقوم تجيب ليها اربعة كروت شحن من النوع ابو خمسين داك و تقدمو ليها بكل تواضع و لسان حالك يقول لو انا ما خدمتك مين اللي ح يخدمك و نحن ما لين ا غير بعض يا (عمري).
• خامسا : انا زعلانة منك شديد لانك نسيت حاجة مهمة جدا و شكلها ح تعدي عليك عادي كدا ,, و انت تشيل و تتذكر و مفيش فايدة و تطلب منها ان تخبرك لكنها ترفض بشدة و بعد ان توعدها بتقديم هدية صغيرة الحجم ,باهظة الثمن تقول ليك الليلة عيد ميلادي... الله انا اسف جدا كيف قدرتا انسي حاجة ذي دي..؟ لكن ما فات شيئ احنا لسه فيها و حاقوم اعمل ليك احلي عيد ميلاد في افخم صالة و (سنة حلوة يا جميل)..
• سادسا : الاسبوع الجاي طبعا ح يكون عرس بت خالتي و انا محتارة اعمل شنو..؟اصلك انت ما فاهم انو بت خالتي دي عزيزة علي كيف., و انا ما عاوزة احضر الحفلة عادية والبس عادي..انا عاوزة الناس كلها تنبهر لمن تشوفني داخلة الحفلة بس يا حسرة ما عندي الامكانية اعمل كدا..! و لا يهمك يا حبيبتي انا موجود و حأجيب ليك احسن فستان و تعملي شعرك عند احسن محل كوافير و اي حاجة تحتاجيها انا موجود...
• سابعا : لو كمان طلعت من النوع البعمل مسكول الزي البو الشهيق داك و لا حتي بتكلف روحها تعمل ليك رسالة ,, اظنها كدا بقت واضحة جدا عندك و لو كمان انت بقيت غبي شديد و ما فهمتها لازم طبعا اشرحها ليك ... دي يا سيدي لو انت فكرت شوية في النظرات الكانت بترمقك بيها في البداية و الاكل الفاخر و المحاضرة البدري و تعال بالعربية و علاج ماما و عيد الميلاد و عرس بت الخالة و المسكولات القصيرة و كل هذه الشياء ما هي الا......... ( الطريق الي نسف جيبك) يا ابو مخ تخين.