قصـــيــــــــــــدة

هذه القصيدة كتبها الشاعر بلسان حال واحد نط عليه حرامي فألف هذه القصيدة يزجره وينبذه فيها – إن شاء الله تعجبكم (منقولة)
تعيقنى انا؟؟
يعيقك الله يا مجرم
تسرقك بطنك ان شاء الله وتخليك ديمة متألم
حضير ان شاء الله يبراك وفلسا للجيوب يخدم
والعطش اليحرق الجوف يخلى الفقرا قايمة وقاعدة ليك تعزم
تعيقنى انا ؟؟
يعيقك الله بى مدفع كلاشنكوف
يولاليك يخليك لا سمع لا شوف
ويجيك عميل من السوفييت مرسلو ليك قربات شوف
شايل حقنه حارقة معاه يحرق ليك قلبك وكبدك وحتى المعدة والشارشوف
تعيقنى انا؟؟
يمين بالله لو سألوك نان عميان من الاسواق؟
تسوق الوقت فى ساقية تورا يقطع الخناق
تسوقلك داف تدقشو ترله فى عقبة يخليك لا ضهر لا ساق
نان بالله لو سألوك ماك عارف القروش بى وين؟
ناس بانيين عمارات كيف وناس راحات وناس تخزين
حكمت تجينى انا المسكين البلقط بى قرش وقرشين؟؟
تقرررشك عقربا تلقاك فوق الريق يكون جسمك مرطب تب
تقرشك سموم الصيف تخلى وشيك قايم حب
وقرشا يبلعك يزرع يلف بى جدة والصومال ويجيبك لينا تانى هنا يرميك فى الرصيف بيجاى يسلب لحمك الفوقك يخليك بس عضام وعصب
تعيقنى انا؟؟
تطرشق لى برنامج اخطط فيه لى سنين ؟؟
يطرشق فيك كمبرسون يخليك انت بس ساردين
ويطرشق فيك بتجازا ويكون جنبك صفيح بنزين
وترقد وما نشوف لنا زول يقولنا ماشى فى تحسين
تعيقنى انا؟؟
كمان تسرق ملاياتى !!
المن كيسا ما انفكت ولا عارف نقوشن كيف ؟؟
يفكك مننا الله اليوم قبل باكر يخليك يابسة فوقا خريف
يفك ضلعك تفارق عقلك تسك الماشي فوق عدلك زي إبلا عشاه الزيف
نفسك فااااااااااااتحه ترقد فوق ملاياتي ؟؟
ترقد يابا في عنبر نصيحو يشابي كايس إيدو
ترقد يابا في قبرا أعوذ ربي من هولو و عذاب سيدو
ترقد يابا فى غرفة تكون مفروشة بالصرفة
ونملا يخمو بالقفة
ولا تشوف جنه بى عينك ولافى العتبة تتعتب
عشان عملك تملى كعب
تسوى العيب تسرق الجيب انت حرامي ود الكلب

تسلم الرشيد ومشكور على هذه القصيده الجميلة ...
لكن كدي النسالك ياخوي الزول ده كلها خلعة من الحرامي خلته يعمل كده دحين لو كان في ام درمان وقت السلاح دور قبل يومين كان قال شنو

لك عاطر الود