امتحان مفاجئ

امتحان

الاسم:.................................................................................................

--------------------------------------------------------------------------------


يجب قراءه الارشادات الاتيه قبل البدء بالاجابه
1ـ ممنوع دخول المساطيل والسكرانيييييييييييين طينه
2ـ يمكنك أن تغش في الإمتحان وأن تشاور الـ (ماما) والـ (بابا) .
3ـ الباص 20 من 100 والتصحيح تحت الجذر.
السؤال الأول:
اشرح المصطلحات التالية باختصار:
الدلوكة، السحاره، الدلكة، الضريسه، الرحط، الضريرة، الفركة، الشملة، الموليتة، الحسكنيت، الرانتوق، التبش، التبر، الضريسا، الكنتوش، القرقريبة، الدوكة، المشلعيب، المرحاكة، الحسوَّة، الرتيلا، الجقر، عتيد البرم، المسلَّة، المقشاشة،الدلاقين ، البربندي،الِّلبا، القلاَّبة، الكجَّامة، الفرار.

السؤال الثاني:
حول هذه القصة إلى لهجة الحناكيش:
عمنول عشة وكت جاتا الوردة مشت لي حكيم شفخانة الحلَّة الحكيم قال ليها لازم تمشي حكيم الاسبتاليا الفي البندر، انخمَّت وفاتت.
أها وكت سعلا موجوعه من شنو قت ليهو:
قاعورد، عندي شحتفت روح، وخمة نفس، والقلب طاحونة الماحي، والخشم عرديب، واللضنين يسون صنننننننن.

السؤال الثالث:
(الدِعا) ب**ر الدال من الأشياء المنتشرة في مجتمعنا السوداني، أي الدُعاء على من تغضب عليه، فأكمل العبارات التالية بالجمل أو الكلمات المناسبة كما في المثال:
1ـ تعال ، تجيك الطاوية حبالا.
2ـ .......، يطير نوم عينك.
3ـ أنزل، ....................
4ـ أطلع ، ...................
5ـ ......، نعامة تزازي بيك

السؤال الرابع:
اشرح الأمثال السودنية التالية:
1ـ مرق بي قد القفة.
2ـ العاجبو حلقو ببلع اللالوب.
3ـ ام زمبيري أكلي وطيري

انتهى الامتحااااان

شكرا على هذا الامتحان (المفاجئ)
بس لكن كان تكتب عليه للكبار فقط

دا عايز ليه دكشنري عدييييييييييييييييييييل كدا

دى عايز زول من الارشيف
لو مافي زول حلا الامتحان دى حلو لينا انت يا مصعب!!

الابن منتصر لك تحياتي
امتحانك زي ما قال بعض الإخوة يجب أن تحدد له أعمار وكل من دورنا شاف شجرة السيرة والسيالة وعام في الطملة وشبع دمبو وستيب الحد الأدنى لمعرفته هو ما ورد في الإمتحان لكن طلبت تحويل بعض الأسئلة للغة لا نعرفها وهذه صعوبة الإمتحان - لذا خلي الباب مفتوح لموضوع اللغات حتى تجد إجابة- والإجابة لازم تكون من أعمار 35 سنة . وإن كنت تقصد تثقيف الناس بمفردات من زمنا السالف فلك التحية وعلى أتم الإستعداد لتزويدك بالمخزون - وجدك سعيد بابكر وعمك حسن قاعدين داب وردة بس ما تطلع بقد القفة

ود اللارسود
سليل المشايلة
تحية وشوق للرؤية
الامتحان زى ماقال عمك كمال موية بالنسبة لينا لكن الشئ اللى ما مصدقه انه الناس تكون جادة فى حكاية عاوز دكشنرى نحن اهلا للعوض ونعتز بذلك وقد كتبت هذا الكلام فى الصحف السيارة نيابة عنكم ردا على احد اولاد مدنى عندما وصف مشجعى المريخ فى مدنى انهم جايين من خلف الكبرى
عموما التفاخر بالاصل والفصل شئ محمود واذا لم تعرفوا المصطلحات الرماد كال حماد
والى الملتقى
شكرا ابننا الميشلى الصغير مشاركاتك ممتازة وتدل على ربط الحاضر بالماضى
وفقك الله

ايها المشايلة وين فضل الله كبيركم الذى علمكم السحر