فاقد الذهب

كت بتمنى تكونى بجنبى
ننسى الدنيا واندهليك بحبى
قبل تتحقق المنيا تبتعدى
وابقى وحيد واستجدى
قلت اكتب ليك من شعرى
وعارفك انت ما بتقرى
...........ولا بتدرى
بس احساسى من بدرى
وحبى البملا كل صدرى
وفجعى عليك وضيق صبرى
**********
البدر غاب
وسط السحاب
وانا لس مستنى السراب
نهارى اسود والليل ضباب
بكيت براى شمتو الصحاب
*****************
حزنى عليك ما بيكمل
وحبى الضايع اتهمل
اقول داقدر؟
ولا طب مصر؟
بهرو الجمال
غمرو الدلال
....عجبو البدر!!
نسى العلاج
....دهشو السدر
ولا اظنو متخصص شعر
عابد ذهب لخمو الشعر
الكان بيعالج كل خطر
غلبو الشلل.......
انا كت فاكر الموضوع سفر
***************
وفضلت احسب فى الايام
يومى كله صبح ضلام
فجأة صرخة من مرام!!!!
عايدة ماتت
عايدة فاتت
ما كت مصدق فى الكلام...غفرانك يارب..توحيدك يارب
*****************************
عرفت انه الموضوع جد سفر
سفرا بعيد لابالجمال لا بالقطر
سفرا اخير من غير وداع من غير صور
بقول قدر ..................بقول قدر
قبلت بيه وجوفى استعر
زاد اللهيب بكيت نحيب ودمعى انهمر
لو كان بتنفعك الدموع كان يومى مليت بحر
يهديك حنان وعفاف كمان ويكسيك درر
واهديك روحى وكل حبى وقلبى يبقالك قبر
ترتاحى فيه تتهنى بيه ويضوى نورك يخفى القمر
دعوات صادقة ياربى..اليها الطف والاحسان
اليها الرحمة والغفران
اليها الجنة والرضوان