عفة وعفاف

وحاتك انتى يا السمحة
بحبك جو من قلبى وحبى بدايته بس لمحة
سكنتى قليبى انا اللهفان
بدون ادراك بلا استئذان......
قدر حاولت اتناسى بشوف سمرة
بشوف قدامى هيبة جان......
اقول بسم الله...القاك برضو قدامى
جمال مدهش رسم فنان.......
مبدع فائق الروعة ...
رسم لوحة...
بدون ريشة بدون الوان.....
سبحانه جل من خالق خلق فتنة جابك رحمة للانسان....
بسمة طفلة نص الليل لقمة عزيزة للجيعان...
نسمة عليلة بعد هجير بقة موية انا العطشان...
اساسق ليك لى مدة وما هاماك مشاويرى انا الخسران..
بساهر ليلى كله انين وازرف دمعى حزين بدور بس كلمة فيها حنان....
تشيل غمى ....
وتزيل همى...
وتهتفى مرة باسمى
*****************
اول كلمة قالت الحلوة دار اقرا
نزلت فوقى زى صاقعة
رضيت سنتين بقت جامعة...
**********************
خلاص ياروحى بنتظرك عشان تقرى...
شايل ريدى ليه شهور وعارفك لسه مابتدرى....
كتير قاومت احساسى كتمت مشاعرى من بدرى............

*********
تعبت خلاس شان قلبى مافى الليد...
قليبى عنيد ...
طبعو فريد ....
بيريد الصيد...
وصيد الريد...
*********
شارى شباكى للحلوة...
وحافظ ليها كم غنوة..
وردت فيها سيرة العفة ولا عفاف...
من عركينا حفظت بخاف...
من القران دوام بقرا فى يس وسورة قاف...
حفظت المرقة ميعادا والاوقاف...
وسيرة اهلك الطيبين ورهافة حسك الشفاف...
وبرضو السمحة دار تقرا
وحاتك انتى ياالملكة وزينة عشا البايتات...
بدورك تيقى ست الكل وجمرة بتحرق المابيات...
اول حاجة اقريك طب
ما انتى شقاى ..
وحتبقى شفاى...
ما انتى الروح وانتى الذات..
بعد يا القمرة ماتمى اودى برة تقرى لغات....
ولمن تبقى دكتورة
وتقعدى تحسبى فى شهادات..
بكلاريوس هندسة وميديسن..
وليسانس جامعة فى الالسن..
بجيك يا العالمة متظلم شايل المال ...
ومرتاح بال..
اهنيك واحجيك بقصتنا الرعاها الفال....
فال الخير والبشرى ايه رايك بعد الحال....
منايا كليمة ...
حلوة نغيمة ...
بحبك موت وما هس دى ريدة قديمة....
وبعدها اسمع خلاص جيت ليك ....
ابارك ليك .....
موافقتى مد ايديك!!..
امد ايدى؟؟
دا ايدينى وروحى الصابرة منتظرة وهبتها ليك....
وقلبى الساكنة جواهوعمرى الكله فى قصادك ونفسى فريسة بين ايديك....
مافيش نور بدون عينيك...
مافى زهور خلاف خديك....
بعد يالسمحة ما كبرتى وشفتى براك صبرى عليك....
طريتى الحب ووافقتى؟؟
يمين قبلان ......وما مصدق كمان فرحان....
عشان حنتمو مشوارنا...
تبقى الملكة ست دارنا...
نزغرد ونعزف اوتارنا...
تعم الفرحة بيناتنا....
بهجة تفرح اماتنا....
وباقى عمرنا نملا سعادة....
جمال خديك ونور عينيك يبقة عبادة...
يبقى سكونى فى قلبك ولى ايديك تبقى وسادة...
بعد ما بقيتى دكتورة
تبقى غرام....
وتبقى مرام...
وتبقى مدام ...
وام لحمادة


****************
التى كتبت فيها الابيات على حسب ما ورد من معلومات لم يحصل النصيب وما زالت بدون زواج
نسال الله لها التوفيق

شكراً للغراميات يا أبو حميد - وطبعاً معظم الناس لا يبوحون ولكنك أبدعت وتضاهي رباعيات الخيام. متعك الله.

اخجلت تواضعنا يا ابوحميد
شكرا على المجاملة الطيبة
هى خواطر شارد الذهن فى لحظة الق وجدانى وتتنفس فيها اوجاع رومانسية تفضى بك الى عالم خيال اجدب