وصية ام لإبنها

من طرف فدوى الأحد يونيو 27, 2010 10:58 am

اوعك تعرس واحدة فيهن

ان بقيت بخيت.....ربنا يديك....مرا هدية ورضية.... السماحة ما ضروري لانو بعد شوية...... ما حتكون ليك سمحة..... حتكون عادية....... نصيحة ليك..... النسوان البقولن ديل اوعك تعرس واحدة فيهن.................

<

الفنانة ......... والحنانة........ والحردانة ,

المدرسة....... والمدبرسة........ والمفلسة ,

النوامة ......... والحوامة ........ واللوامة ,
البوبارة ....... والكوُبارة........ والخبّارة ,
الممحوقة ...... والمطلوقة ........ واللايوقة
>

اها...اجي اوريك ليه؟

الفنانة...... حتمرق معاها وتقعد تحوم.....في الحفلات...وتشوف كرسي قدام. وتقعد فيهو..شايل عكازك....وسكينك في ضراعك....وعينك عليها.......ان راجل بشّر ساكت..... تتحنفش...وتقوم......الا يهجروك اتنين...علي الكرسي.....وتجو نص الليل راجعين اهلكم....والنهار كلو نايمين....

الحنانة........طول النهار برا البيت....تحنن في نسوان الرجال....وهي كرعيها يكونن ما شافن حنة ليهن سنتين...والنهار كلوانت تحاحي في الشفع ما يلمسو الصبغة....
الحردانة......دي حتكرهك حياتك....اقل كلمة...تتقنّع توبها وتجري بيت ناس ابوها...وتلحقها انت.....وتلقى ابوها....تقعد في طرف العنقريب.... تطقطق...في اصابعيك.. ومدنقر في الواطة...وداير تراضيها ترجع البيت....... لكن احسن حل لك يا تسكنو مع ناس ابوها...ياتجيب ناس ابوها عندكم ....عشان توفر المشاوير والجري..........
المدرسة..........اول حاجة دي ما بتقدر تفرق بينك وبين الطلبة...... وحتقعد..... تعيد وتكرر في الكلام مليون مرة..زي برنامج من الامس الفي تلفزيون السودان....وممكن جدا تسرح وتقول لك فاهم يا شاطر؟
المدبرسة........تلقها طوالي زهجانة.....وشايله اخلاقها في طرف نخرتها...وان كلكلتها ما تضحك........في النهاية حتوديك التيجاني الماحي...... نزيل اكتئاب
المفلسة.........طبعاً دي ما دايرالا أي شرح واضحة يا وليدي
النوامة......... تجي من الشغل نص النهار وزهجان.... تلقها....تانية المخدة وخاته ايدها تحتها....وتشخر... وريالتها سايله...وحالتها بالبلا.....وتكره اليوم الفكرت انت فيهو في التكاثر........
الحوامة.........طول اليوم فوق كرعيها...في الحلة من بيت لبيت.....وتدخل البيت.. قبال ما انت تجي من الشغل بخمسة دقائق....وتجري تولع النار.......وتطبخ لك القطر قام....واول ما ينتهي الغدا .....تدخل في سفنجتها....استعداد لرحلة جديدة
اللوامة.....دا نوع مزعج جدا.....لو جبت سيرة اخوك ساكت....تفتح فيهو... الله بيسألني.......سنتنا ديك وقت انت خليتنا بلا قروش وسافرت.... يدخل ويمرق علينا مدلدل ايدهو...كويس موز ساكت ما بيجي شايلو.......ولو جبت سيرة امك...... هي والله امك دي اصلها ما بتريدني.....من توشفني تزعل والنيران تطلق فيها...وتمد قدومها.....ووليداتي ديل السلام.... يا الله ويا امين تسلم عليهم......
البوبارة.......دي تحملك فوق طاقتك...تشريك الما بينشري....وجيت ناس في البيت...تجري علي علبة الدهب...وتتعنكش علها من راسها لكرعيها....وتقعد تنضم..بايديها وكرعيها ورقبتها...واضنيها...عشان توري الدهب
الكوبارة........دي تكبر أي موضوع...وتسوي ليهوتوم وشمار..... وتقول لك ناس القبور دقو الطنبور...... لو شافع من شفعك.....عتر ووقع...... تصرخ وتخت ايديها في نص راسها.....وبطول حسها.....ووووووووب علي ووووووووب علي ...مااااااات ...ماااااااااات........ يسمعوها في الشارع....والغريبة لو انت كنت نايم وسمعتها..... تقوم مخلوع.....وتمرق من الاوضة لحدي نص الصالة.....وانت بي هدوم نومك........اما لو كان عندك قلب مرضان....اللحظة ديك....من المهد الي اللحد
الخبّارة...... البي تدور الخبار..... لو في نضم تلقاها سكتت الشفع....ونهرتهم عشان تسمع.......الجيران مالهم بيهرجو وصوتهم عالي......ولو كانت بتكوي لك في هدوم.....قطع شك......قميص ولاّ جلابيه.....حيكون في عداد ضحايا الحريق.....وممكن الملاح...يحرق وممكن الجردل يكون في الماسورة.... يتملي والبيت يغرق من الفيضان......وحرمكم المصون واقفة فاتحة خشمها وتصنت للجيران........
الممحوقة ..............دي ان جبت دكان كامل وختيتو لها في البيت تكملو في يومين......تصوطو كلو فوق تحت...........لكن ممكن توديها لاصحابك الزعلان منهم لو عندهم مناسبة تطبخ لهم.... عشان....لما المناسبة تنتهي يشحدو وانت تتبسط........
المطلوقة........... نو كومينت يا جناي
اللايوقة..........دي حكاية تانية.... تمسك في موضوع يحلك منو الجليل الرحيم......يا...دا ....هوي يا دا..... الليله يا يمة.... طرشت؟...وقدرما تطنش هي مصرة.....وممكن تجي جنبك وتخجك.....خجة جامدةعشان تنتبه...... للنقة

من طرف ابوفدوى الثلاثاء فبراير 26, 2013 3:53 pm

جميل هذا التحليل اللازع الساخر الحقيقي تماما
ولكن يبقى حب الناس مذاهب ولا شنو
سمك ....

الأخت فدوي لك التحية والله دي أعظم وصية والده لأبنها ولو أطبقت بي حزافيرها مافي قشه حاتعتر لي زول كما أشكر فيك السرد القصصي الكوميدي الجاذب للأطلاع والأستمتاع في آن واحد مزيدا من المواضيع الهادفة الجميلة . في أمان الله

من طرف نصرالدين الأربعاء فبراير 27, 2013 6:55 am

شكرا ابنتى فدوى عبدالفتاح وكلامك فى محلوا

الأخت فدوي لك التحية لكن ما خليتى لينا خيارات\

وصية ام لإبنها

وصية ام لإبنها

رد: وصية ام لإبنها

رد: وصية ام لإبنها

رد: وصية ام لإبنها

رد: وصية ام لإبنها