وصية أم نجيضة لإبنتها العروس..!!!

يا بت هوووي فتحي عينك قدر الريال و ابقي نجيضة وفالحة.. قدُر ما أجي داخله عليكم القاكي ... هي هي هي ... و قر قر قر .. تضحكي مع عبد الله راجلك دا...

الراجل ما تضحكي ليهو كتير.. يسألني الله بحقر بيك...الراجل لازم تديهو العين الحمرا... وان قدرتي لعند ايدك تلحقيها ليهو .. لحقيها..ابقي نجيضة..أيَّة.. زي امك..الله بسألني وقت ابوكي يقول حاجة تَضحِك... امشي اتحشر جوة الأوضة واضحك زين وأجي مارقة ليهو صارة وشي..

وبعدين اوعك ثم اوعك .. ثم ايضا اوعك.. تقولي ليهو الجلابية دي سمحة ، ولاَ العمه اللابسها دي سمحة.. نفسو تقوم تعجبو إعرس فوقك... وبعدين تشربي ما تروي...وأكربيهو بالطلبات طوالي ... اوعي تخلي ليك قرش يبيت في جيبو..وأوعك تخليهو يشوف المسلسلات... المسلسلات بيخربن الرجال...

وقت المسلسل داك... شفتي جيبي فندقك..واقعدي دقي أي حاجة جنبو ويا ريت لو كانت شطة.. ولو كان عندك شافع بيرضع وجيعان وبيبكي خليهو في بكاهو داك لمن المسلسل ينتهي..

وان جنك نسوان ولَى بنات...ما تخليهو يقعد وسطن...ويتونس... طيريهو من البيت...وان ابى امرق.. قدر ما يقول ليهن نكته والله اخفف دمو قدامن صري ليهو وشك... وقولي ليو انت يا عبد الله ؟ ما عندك غير النكتة دي؟ يا خي عملت لينا بيها وجع وش..

اصلهم الرجال عارفاهم.. الواحد فيهم من يشوفلو لمت بنات يقعد يخفف في دمو ويعمل فيها ود نفاش.. وتلقيهو يضحك بلا سبب.. حتى ان واحدة كحت ساكت .. يقعد يضحك ويصفق ايديهو...واوعك تخليهو معاهن وتدخلي المطبخ تسوي ليك شربات..