عيشتنا عيشة هم

ربع اللحم بي كم
كيلو الدقيق بي كم
رطل اللبن بي كم
والسكر أسي بي كم
وصل الرغيف لي كم
والراتب أصلا كم
****
جوانا زاد الهم
والعيشة صبحت غم
لا يوم أبوك برتاح
لاتضوقة راحة الأم
بيضنا لقلوبنا
صبحت حياتنا سجم
حتي العلاج مافي
ومريضنا نفسو إنخم
وظروفنا جت جاطت
والوضع جد بلخم
وشفع صغار ببكو
من دون أهل لا عم
والدنيا صبحت زيف
وآمالنا ضايعة وهم
كل يوم نقول نفرح
لامن شربنا السم
الناس بتاكل الناس
وسودانا إتقسم
تايهين ولا واعين
وعدونا بتحزم
حالف علينا أكيد
وبخرابنا نحن جزم
لا زول بفك الضيق
لا لي فقير برحم
ولمتين نزيلو الهم
وبلادنا تتقدم
وكونك تعيش مرتاح
زي التقول تحلم
مابتلقي قوت اليوم
لو حتي بعت فحم
وحتي الصغير بصرخ
بالقوة ساي فطم
لا صحة لا تعليم
رافعين فقرنا علم
لا لينا شالوا الهم
لا حسو لحظة ندم
هو شنو الحصل ياناس
ليه نحن صوتنا كتم
لمتين نشوف الصاح
من غيرنا نتعلم
لمتين يشع النور
ونزيل جوانا عتم
لمتين ننوم نرتاح
من النزيف والدم
نتغني بإلاصلاح
ونقيف نجر النم
وخيراتنا تملأ الكون
وأفراحنا نحن تعم
وتبقي البلد مرتع
وأولادنا تاني تلم
لا زول ينوم بردان
لا زول بيفتح فم
وعيشتنا تصبح خير
وبينا السلام ينجم
ده البينا لو عاشو
إبليس أكان أسلم
لا زول بقول الحق
لا عاقل اتكلم
ليش القلوب بتموت
وأفكارنا تتهدم
لا فينا زول فرحان
لا من عذاب بسلم
وشبابنا روح وفات
وجروحنا مابتنضم
عايشين كما الأموات
فاقدين هوية وإسم ...

الابنه وفاق تحياتى للاخ/ اللواء/عبدالباقى وكلماتك فى محلها وربنا ازيل الهم والقصيده رائعه

اللهم آميييين ربنا ييسر الحال
وتسلم كتير ع المرور

تحية واحترام الاخت وفاق
دي حال البلد  ونسأل العلي الجليل ان يخفف وييسر كل الامور . وهذه امتحانات وابتلائات من الله سبحانه وتعالى ونسأل الله ان نتفوق فيها وان يلهمنا الصبر الجميل لدرء هذا الضنك . " ان الله اذا ما احب العبد ابتلاه " .


لكي كل الود والتقدير ...

كﻻم روعه اختي وفاق ومازلنا ننتظر على ابواب التمني نصر من الله.