عذاب الغربه

عذاب الغربه
وداد طه خالد حاكم


يوم فراقك ياحلتنا ليله
من احلك الليالى
فيها ودعت المسره
وسكنت الآلام خيالى
كنت فاكر انى بقدر
اشقى احتمل المصاعب مابالى
الا يوم فارقت ضلك
مالقيت زولا مثالى
مالقيت فى الغربه ابدا
كلمة تحمل معنى حالى
مانسيتك انتى اصلا
مابارحت عينيك بالى
رغم غربه مريره قاسيه
فاكر فيك ايامى الخوالى
لمة القهوه الحبيه
وونسة الناس العصارى
قيمة الحب والتواصل
الراسخه فى عمق الاهالى
لوحة النيل الجميله
وغنوة الطير الخدارى
بهرة القمر البيلمع
وضوه فى رملك بيلالئ
عيون عزة الحبيبة
معزوفة الحب والقماري
ما نسيت حبوبه أبداَ
و حجوة الثائر النضالي
وعيون أهلى البريدن
وتقوة الشعب الرسالى
والقلوب الفايضة بشرى
والمروية بطيب الخصال
مانسيت بيوتا ولا الازقه
ودبة الخور والاعالى
لقمة العيش البتسند
ضعيفا جوفه خالى
هناك فى الغربه يمه
كل يوم تمشى حاسى
تضوق المر وتشقى
وياما تتجرع مآسى
تمشى تايه فى دروبا
مابتلاقى حبيب اواسى
ناس فاقده المشاعر
جامده بس شبه الكراسى
مابتلاقى وجيه بيضحك
بس ملامح زول نحاسى
عيشه الغربه يمه مركب
تايهه تبحث عن مراسى
الدفه والمقداف مكسر
والموج جثم فوق ليها جاثى
ورحى ضاقت من شقاها
ومن زمن قلبى حاسى
انى مابقدر اطول فى
بلد لقيمتى قاسى
خلاص قررت ارجع
تانى ارجع للمراسى
عايز اقولك غنى يمه
غنوة الفال والعديله
حضرى الجرتق معاهو
هلال خرزه وحريره
كلمى الناس قولى ليهم
انا جاى للناس الاصيله
جاى للعز والرجوله
وللمقامات النبيله
جاى لبيض الضمائر
وعشان صافى السريره
جاى للوطن البحبو
وجاى طالع فى مسيره
داير اهتف اصيح اردد
تسقط الغربه الرزيله
ترجع الناس لبلادا
تتكاتف ايديه تشيلا
يلا ياحلتنا غنى
ماخلاص جاى لربوعك
يلا يمه امسحى من شلوخ
خديك دموعك
غنى بالفال والعديله
تضوى بالافراح شموعك
جيت اعيش جواك انت
داير اسكن بين ضلوعك
يلا فرهدى يابلادى
ماخلاص عاوزفروعك
من بعيد جيت بس عشانك
جيت اضمد لصدوعك
ايدى فى ايديك ديمه
ومافى زول بقدر يروعك

بسمتك
بشوف فى بسمتك شاره
فرح اخضر
بشوف فى بسمتك دنيا
مزاقا حلاوة السكر
اسافر رحله ورديه
فى عالم جميل انضر
شرائين شوقى تتفجر
تعطر جوى بالياسمين وبالصندل
بشوف فى بسمتك زهره
تقبل فى خدود طفله
واقول يارب منو الفيكم
يستنشق عبير الاخرى؟
الطفله ولا الزهره ؟
تجينى اجابه فى الوهله
بانو الطفله منزهله
لانك احلى من زهره
**************
بشوف فى بسمتك شاره
فرح اخضر
بشوف بسمتك دنيا
عبيره نداوة العمبر
حريرا نعومة المرمر
حديقه ملانه بالازهار
الاصفر والاخضر والاحمر
وكل نحلاتنا مشغوله
من رحيق بسمك
تروينا احلى عسل
واشوف فى بسمتك دنيا
تفوق كل الخيال والصور
اسافر رحله ورديه
فى مد الافق وارحل
اصادف فى الطريق منهل
خرير المويه احلى وتر
محاط بعيون بترتل
تعويذه خوف العين وتستغفر
بشوف فى بسمتك دنيا
جلُ المبدع الصُور
يزيد امانى واتأمل
بأنه حقيقه قد ابدع
حصر فيك الجمال كملُ
***********
وداد طه خالد حاكم