ذكريات القرية

بعيديا اخوانا بتذكر
واصلوا عمرنا جدول شوق
وحبة ذكرى ما اكتر
حليل النيل يفرحنا
وموية تفيض وتتبعثر
نبنى بيوتا بطينوا
نسيبها تفوت وتتكسر
ونرجع اهلنا فرحانين
نفتش علبة السكر
ونشحد يابا تعريفة
دحين يا ابوى مابتقدر
يقول والله والله
ويحلف زين ويتعذر
ونزعل نحن برقة
دموعنا تفيض وتتبعثر
بعيد يا أخوانا بتذكر
لمة بيتنا كل صباح
وقعدة يما فى البنبر
وتناولك داك حبيبة شاى
وتدى التانى مابتفتر
ونحن نشيل زلابية وعيش
مع شاينا نتحكر
دى صورة نعيشها كل صباح
محال فى يوم حتتكرر
بعيد يا اخوانا بتذكر
شوارع الحلة والدكان
ولون الشارع الاسمر
وحاجة تبيع تسالى وفول
تحت نيما ظليل اخضر
ونخطف نحن نجرى هناك
وهى المسكينة مابتقدر
وماعارفين مصيرنا يكون **وكت نكبر
تلقى الدنيا **مرة الدنيا
لما تفور وتتعكر
واصلوا الما عتر فى يوم
مصيروا يعيش ويتعتر....

[b]

شكرا على المرور..الخال...وعزة..وانشاء الله ماتعتروا ابدا.

القصيدة جد رائعة وبمناسبة القرية شفتوا الفيديو كليب المصور فى الدناقلة اسمو انا غنيت لى اخوى اداء الفنان محمد الفاتح وتقريبا كان فى العايداب

ونسيت اقول القناة هى هارمونى

عرفتو كيف يا عبد الحافظ اتصور فى العيداب حصلت فيهو شكله ولاشنو انا القاعد فى مدنى ماعرفتوا.