ما زالت القصة تروى : العرس قسمة ونصيب!!!

من طرف محمد الامين الأحد سبتمبر 14, 2008 9:39 pm

زولتنا كانت سمحه جد
في عيونا كان الليل لبد
و في رموشا كان القيف كان شرد
و في الضحكه بصب البرد
و لكل سوال كان للجمال في عيونا رد
و زولنا كان بريدا جد في ريدا ما كان ليها حد و القصه عارفها البلد
بلقها لو يوم قام فجر في ونسه في شاي العصر
جنب بيتا لو حايم كدر
و دايما حديثم في العرس
وكيف يلملمولو قرش قرش
و كيف يبنو من ساسو التحت لمن يودهو العرش
و كانو عايشين في غرام لافيهو خداع لافيه غش لا فيه كرامه بتنخدش
و تمر سنين بكل حنين لا فيها الم لا فيها انين
و زولتنا كان حافظا الوعد و لزولنا تب ما تغيرت لا من قريب لا من بعيد
و ياهو البحصل يا اهل لو كان صحيح الزول بريد
و صاحبنا بلم في المهر بالرغم من دخلو البسيط 200 جنيه اخر الشهر
فيها الاكل و فيها اللبس و فيها العلاج فيها الوفر
و شان كنتي يالسمحه الامل
لا كدة لا ضاق بيهو فتر
بالرغم من حالو الصعب و بالرغم من دخلو الكعب
بالرغم من تعبو الشديد شان كان صحيح الريده في دم الوريد
بس بالزمن السمحه يوم اتغيرت و الزمن ياكل الحديد
السمحه ليه اتبدلت لزول تعب و نست الحنان في القلب
و السمحه ليه اتغيرت لي زول بحب و القصه ما كانت كضب
0*0*0*0*0*0*0*0*0*0*0*0*0*0*0*0*0*0*0*0*0*0*0*0*0* 0
زولتنا بلا مغترب
السمحه بلا مغترب زولتنا يوم الوافقت صاحبنا في المقلب شرب
و كان العذراصلو العرس قسمه و نصيب
صاح .. يا اهل اصلو العرس قسمه و نصيب
بس يا اهل وين قسمه الخاضو الحرب
طول عمرهم لا اتغيرو لاحدو يوم من الدرب
و ين الحنان و ين المشاعر الفي القلب
بعاهوا بكوم الشنط
بعاهوا بالجزم ام سست
بعاهوا بالكمين جنيه و الكم شبط و الكم جنيه القالو لي قطع الرحط
بعاهو بصفقة بنات زغريد حريم وعلب كريم
وادوك للبقدر يجيب
و قالو العرس قسمه و نصيب
0*0*0*0*0*0*0*0*0*0*0*0*0*0*0*0*0**0*0*0*00**0*0*0 *0*0
و لو عارفه يا زينة البنات دقو الجرس بعاوك في سوق الرقيق
ودوك في اخطر طريق من دون رفيق من دون حبيب
ادوك للبقدر بجيب و قالو العرس قسمه و نصيب
و لو عارفه يا زينة البنات غشوك بيصوان كبير و عريس كمان في البدله عامل زي عوير
و البنسون اب عشرين كمان ولعه فيها صمام امان و كدوس عجيب دخانو بطلع بالاضان
و بنات عدد صفق الشجر
و السيره كان لا ليها راس لا ليها قعر و فنان يلعلع للفجر
و تطلبي شئ البيت قريب و التكسي بودي و يجيب
و قالو العرس قسمه و نصيب
و قالو العرس قسمه و نصيب

ما زالت قصة تروى وتروي العرس قسمة ونصيب!!!

من طرف عمر الخير الإثنين سبتمبر 15, 2008 6:16 pm

يا أخي ود الامين ...
فعلا العرس والزواج قسمة ونصيب لليله وبكره ورايك شنو ؟؟؟
إذا ادوك شاكوش قول ادوني ما تخجل؟ عادي زي الزبادي...
ولك تحياتي ...

من طرف ابو الزعيم الثلاثاء سبتمبر 16, 2008 5:07 am

لك التحية ود العمدة
ومشكور على هذه القصيدة الرائعة التي كانت تحكي الحال
زمن الاغتراب اغتراب
لكن ياخوي الا تتفق معي الان بان بناتنا بقن اوعى من كده

......................................
ود الخير عاطر تحياتي لك يا ملك
وانت مالك زعلان كده مافي زول غالطك
اصلو العرس قسمة ونصيب
لكن ياخوي ود العمدة ده يكون راسو مفلوق
كدي اتحسسو ووريني الشمار

من طرف محمد الامين الأربعاء سبتمبر 17, 2008 8:57 pm

لكم التحية ..أعزائي ... ودالخير .. ود الياس
الزييييييي ما بدوه شاكوش والحمد لله ...
ودي خطرفات عشان تقلل الصدمات واللكمات ...
وإنشاء الله .. الطريق يكون سالك بدون مطبات خصوصا للشباب
ما خلاص عدينا ...
ألا توفقوني أن بعض الشواكيش بتقوي الواحد ...
وبعضها بدووش .><.
وهذه فقط آراء وأشياء معاشه

ما زالت القصة تروى : العرس قسمة ونصيب!!!

ما زالت القصة تروى : العرس قسمة ونصيب!!!

رد: ما زالت القصة تروى : العرس قسمة ونصيب!!!

رد: ما زالت القصة تروى : العرس قسمة ونصيب!!!

رد: ما زالت القصة تروى : العرس قسمة ونصيب!!!