كرسي الاعتراف 2 - كراش

THE GHOST كتب:


س1/ بداية مع السؤال الروتيني المعتاد .. البطاقة الشخصية بالكامل ؟
الاسم : رشا عبدالجبار أحمد الياس
مجال الدراسة : جامعة الخرطوم \ كلية الطب\ المستوى الأول
الميلاد: 27\3\1991 \ البريقة - ليبيا
السكن : الخرطوم بحري


س2/ مالسر وراء اختيار اسم crash ?
والله كل مافي الموضوع انه في لعبة بلي ستيشن بطلها اسمه كراش وصحباتي بيقولو كل ما يشوفوه بيتذكروني فبقوا مسميني عليهو ( بيني وبينكم كراش دى كان اهبل شوية لكن ما تكلموا زول )

س3/ماهو الشيء الذي تتمني تغيره في المنتدى ؟
يمكن شكله خصوصا انه تم سنة على نفس الديزاين

س4/ الا تعتقدين بأن منتدى حواء يحتاج الى بعض التفعيل ليصبح اكثر نشاطا ؟ ومالذي ينقصه ؟
اكيد يحتاج للحيوية .. ومعليش اذا كنت انا اتشغلت عنه الفترة الفاتت لكن ان شاء الله الفتره الجاية حيكون انشط خصوصا مع وجود الاخوات بلسم ونونا ورفيدة .. ونتمنى تزايد عدد العضوات بيننا

س5/اخر رواية قرأتيها ؟
عموما انا ما بقرا روايات وما عندي ليها صبر ... لكن الرواية الوحيدة القريتها كان قبل سنتين بالضبط وكان اسمها (طفل اسمه نكرة)

س6/النسيان نعمه ... مالذي تتمني نسيانه ؟
اتمنى نسيان سنة 2007-2008 اللي هي سنة اعادة سنة تالتة

س7/ ماهي نقطة ضعفك ؟
خوفي من الهزيمة .. بخليني اصلاً ما أدخل في منافسة



س8/ عبري عن شخصيتك في كلمة واحده ؟
مرحة ( على ما أظن )

س9/ اذا كنتي شمعه لمن تحترقين ؟ واذا كانت لديك شمعه لمن ستضيئينها ؟
اكيد احترق لأمي وأبوي .. ولو عندي شمعة سأضيئها لصديقتي الغالية تهاني

س10/ اكتبي رسالة لعضو او عضوة من غير ذكر اسمه بشرط ان يفهمها الشخص ويعرف انه القصود ؟
انت عارف انك من أغلى الناس علي ومهما يحصل حتفضل ليك مكانتك ..وانا واثقة من انك خاتي لي نفس القدر من الاحترام .. وانا عارفة انت ليه اتغيرت كده وانت عارف اني عارفه ومافي زول فينا قادر يقول للتاني ولا حيقول للتاني ... ( لو قريتو الكلام دى مية مرة ما حتفهموا حاجة عشان كدة ما تتعبوا روحكم وخلو سيد الشي يفهم براه وان شا الله يفهم )

سؤال خارج الخط / هل تشعرين بالغباء عند مشاهدة الافلام الهندية ؟
أبدا ... بالعكس بستمتع جدا



مع تحياتي awab

ابو لين كتب:سوالى الاول يا كراش
انت بتزعلى بى سرعة و لا


وسوالى التانى هل الطب صعب وهل هنالك امكانية للتفوق فى الطب والتفاعل بقوة فى المنتدى


والتالت انت فى 18 سنة وصلت اولى طب هل انت راضية عن ذلك

ولنا عودة

moh55 كتب:سلام
ظلت تلك الصوره المعبره عنك فىالمنتدى ولفتره طويله على الرغم من انك كنت تهوى التغيير
ماذا تعنى ولماذا لم تتعير كمثيلاتها ؟

لو ما حالفك النجاح والقبول فى الطب ماذا كنت صانعه ؟

هل تستطيعى توجيه شخص مباشرة مع زكر اسمه والاشاره الى سلوكه دون النظر الى عواقب ما يترتب عليه ذلك ؟

مع فايق تقديرى

بصراحة انا متأكدة اذا فهمت سؤالك الأول ... بس اذا قصدك الصورة الرمزية لي ..
اصلا انا بحب الصور الكرتونية ( والمسلسلات الكرتونية وأغانيها وكل ما يتعلق بيها ) والصورة دي فيها نوع من البراءة والخجل والطفولة فشدتني جدا ( وكان حب من أول نظرة ) وسبب عدم تغيرها اني اصلاً الفتره الفاتت ما كنت بدخل النت كتير .. لكن بشكل عام انا بحب الثبات في الحاجات دي وكنت بغير لاني ما لاقيه شيء اثبت عليه لكن شكلي حأثبت خلاص

لو تتذكر الانا كنت كاتباه في موضوع ( النتيجة قربتوقمنا على الهضربة ) كنت حتفهم انه انا الطب ما كان فارق معاي كتير ... انا مؤمنة بانه الواحد ممكن يتفوق في اي مجال لو كان مقتنع بيو ... يعني لو ما اتفوقت ودخلت طب كنت حأدخل حاجة تانية .. وبصراحة بالرغم من انك حتستغرب انا حتى بعد ما كانت نسبتي بتدخلني طب برضو كان نفسي اقرأ علوم أحياء ..
عموما الحمد لله اني دخلت طب لأني اكتشفت روعته بعد دخلته

السؤال الاخير هل انت قاصد اني اوجه كلام لعضو يعني ولا السؤال العام ؟
انا اي كلام عايزة اقوله لزول بقوله ليو .. وصريحة جدا والمفروض انكم تكونوا حسيتوا الحاجة دي ..
ولو قصدك توجيه لعضو فما اعتقد انه عندي توجيه معين
ولك خالص احترامي

اللي بعده ...

الجعلتي كتب:السلام عليكم
من طبيعة الانسان الندم على ما فات هل شعرت بالتدم على شئ فاتك ؟

ابو الزعيم كتب:الليلة جاك الموت يا تارك الصلاة
من زمان وانا بفتش لليوم ده

............ جاهزة ولا نديك راحة تجاوبي على ما سبق من اسئلة ...........
انا شايف اخليك تجاوبي اول وبعدين راجع ليك .......
الله يكون في عونك ده حالتو اليوم الاول
تحياتي

THE GHOST كتب:ماتخافي رشا .. دورو قرب ان شاء الله

بالنسبة لكراش .. تصدقي عندنا واحد بنسمي نفس الاسم عشان نفس السبب


طيب رشا سؤال " صدقيني فرصة اكتر من الاسئلة "

لو لم يقدر لك دخول الطب ... مالمجال الذي كنتي ستختارينه ؟

سؤال تاني / بصراحة فعل أقدمتي عليه وندمتي ؟

[ندعوك للتسجيل في المنتدى أو التعريف بنفسك لمعاينة هذه الصورة]

شنو العلاقة بين رشا وكراش ؟ كلهم مرحين

walo كتب:وجا دوري عشان أسالك
المرح ومشاغبة حاجة حلوة وبتحبب الناس فيك سؤالي ليك هل بتفضلي انك تتعاملي بجدية مع بعض الناس خصوصا انو في ناس ممكن يزعلو من الهظار او حاجة زي دي ؟
وهل بتجاملي الناس ؟
ولو طلبوا منك تقعدي يوم كامل من غير مشاغبة (يوم جادي مافيهو مرح ) هل حتقدري ؟

ابو لين كتب:الدكتورة كراش مفاجئات الحياة كثيرة وانفعالاتنا معها تختلف
- ماذا لو اتضح انو.. . . . . . . . . . صاحبتك تهانى غشاشة وبتكرهك(طبعا انشاء الله ما يحصل)
- ماذا لو اتضح انو....................... منتدى حواء هو اقل المنتديات جمالا(انشاء الله ما يتضح)
- ماذا لو اتضح انو.. . . . . . . . .. جامعة الخرطوم هى الجامعة رقم 4 فى السودان(مثلا يعنى)
- ماذا لو اتضح انو. . . . . . الرائع محمد عبد الجبار ساهم مساهمة بسيطة فقط فى صناعة هذا المنتدى اما من صنعه وبكل فخر فهو الاخ ابو لين(ارجوك ما تتضحكى على السوال دا لانو انا جاد)


ولنا عودة

اولاً انا واثقة من تهاني ولا يمكن تغشني ولا بتقدر تكرهني ... يعني كان كرهتني انا تاني تحب منو ؟؟؟
لكن لو حصل كده .. ولا حأكرهها ولا حأغشها ةحأتعامل معاها كأي زول تاني وفي النهاية حتبقى فعلاً كأي زول تاني ( وانا عارفه صعوبة الموقف لأني مريت بيو قبل كدة وما من السهل انه اعز اصحابك يبقى زول عادي بالنسبة ليك وكل ما تشوفه ما بتقدر حتى تعاين في عيونه حتى لو بعد سنتين )

يعني يا خوانا انا عارفه روحي مقصرة في منتدى حواء وما شغاله بيو كتير كل مرة تذكروني بيو ( 8) 8) 8) 8) )
بعدين هو ما اقل المنتديات جمالا في منتدى الصور بعده

بجدية كدة ... طبعا حأزعل وحأحرده وحأهمله زيادة .. دى في البداية بس بعد ما استهدى بالله حأفكر في حاجة انشطه بيها

على فكرة جامعة الخرطوم كان رقم 1 ولا 4 مافارقة معاي كتير ... انا اصلا كنت عايزة اقرى في الجزيرة ...

لو طلعت انت ليك معظم الفضل في المنتدى ... اولا حأستغرب انه دي ما طباع محمد انه ينسب ليه حاجة ما حقته وبعدين حأحتج على تصرفه وبعدين حأسحب عضويتي منه لأنه حيكون منتدى ما نافع ( النقطة الأخيرة دي كتبتها غصباً عني ما قادرة استحمل لا زم اتلائم عليك بعد اسئلتك دي )

بنجور كتب:تحيه طيبه وانشاء نكون خفيفى الظل عليك
مواقف مرت بك(مفرح-محزن-محرج)
ولنا عوده!!!

THE GHOST كتب:والله الكرسي مسخن

كل الشكر للذين تواصلوا وسألوا ... وين ابو الزعيم ؟

اعترفي بسرعة

اخر رسالة جوال وصلتك ؟ ومن منو ؟

اختار ليك كم عضو وتقولي لي رأيك فيهم بصراحة وفي كلمتين بس

walo

ابو لين

محمد حمراي

ابو الزعيم

منذر

سؤال اخير " قلت ليكم الكرسي مسخن "

شنو الهدية البتحبي انها تنهدى ليك ؟
منتظرين ابو الزعيم

ابو الزعيم كتب:والله ما عارف اقول شنو
الله يخليكم يا شباب
وبعدين براحة على بت عمي عشان لاقنها مسكينة ولا شنو وقعتو فيها اسئلة صعبة كده
وانت يا اواب كان في داعي للسؤال الاخير ده احرجتنا ياخ .. هدية شنو هسه ده وقتو متين العيد جا
........... بنت عمي العزيزة ...........

والله الاسئلة شكلو الشباب كملوها مني سرقو من اسئلة كتيرة
لكن خليني اسال سوال سوالين خفاف كده

رايك بصراحة في ابناء وبنات جيلك .. طريقة تفكيرهم .. تعاملهم ... اسلوبهم في الحياة الخ ....

وحسب معاشرتك للجيل الذي سبقك مثلاً جيلنا مع انو فرقنا في العمر ما كبير
ما الذي تعيبيه في جيلنا و ما الذي تحبيه ...

اعرف قوة شخصيتك واعتداتك بنفسك ... ويعجبني هذا فيك

بمن تاثرتي .. في من حواليك ... او شخصيات خارج نطاق الاسرة الصغيرة

معلومة للجميع اول من علمني التعامل مع الانترنت هي اختي الصغيرة العزيزة رشا .... وفي ذلك الوقت لم يكن عمرها تجاوز 10 او 11 عام

رشا يقولون العالم اصبح قرية صغيرة ... وذلك بسبب التطور التكنلوجي الملحوظ
ما تقيمك لاستفادتنا نحن الشباب ...الشباب العربي عامة والشباب السوداني بصورة خاصة من هذه التكنولوجا والنت خصوصاً

اكتفي بهذا القدر الى حين
ولنا عوده
لكم جميعاً معزتي

ابو الزعيم كتب:دكتورة رشا
لك الشكر على الاجابات الصريحة وواعية
بمناسبة تعليمك لي للنت نسيت ايضاً ان اذكر ان للدكتورة رفيدة الفضل ايضا ًفي تعليمي للنت ...( الم تتزكري ناس مكتوب )
نعود للاسئلة وبالجد المحرق روحي كتير لكن خلي الطابق مستور يا دكتورة

ما هو رايك بين الصداقة بين البنت والولد
وايهما اصدق واوفئ الصداقة بين البنت والبنت ولا البنت والولد

... .. .. كوني بخير ... .. ..

THE GHOST كتب:أهنيك رشا على طولة بالك وصبرك على الاسئلة الصعبة دي

صدقيني اصعب من اسئلة الوزارة

سؤال تاني / هل انت مع او ضد تشجيع المرأة لكرة القدم ؟

سؤال جديد / هل نحن كسودانيين وكما يقال " شعب كسول " ؟

تحياتي

ماعندي مشكلة مع تشجيع المرأة للكورة .. لكن كان ما شجعتها يكون احسن

والله يا أواب اذا كان الشعب السوداني شعب كسول فانا ما بلومه لسببين ..
الأول عشان يقلو من معدل العمليات الأستقلابية المنتجة للحرارة وهم اصلاً ما ناقصين حرارة كهربا ما عندهم ..
التاني عشان يقللوا من استهلاك الطاقة وطبعا انت عارف عشان يلقوا طاقة لازم ياكلوا !! واكلنا على قدرنا فمافي داعي للنشاطات الزايدة ...

THE GHOST كتب:شفتي عشان اتأخرتي حأسألك تاني

من ردودك صراحة لفحت لي سؤالين كدا واحب انك تجاوبي عليها

س1/ انتي قلتي لابو لين انو المنتدى ماحيكون نافع لو كان له اليد الاولى في المنتدى ماأخوك المحروس محمد ... طيب يعني انتي متسجلة في المنتدى دا مجاملة لاخوك مااكتر ؟

س2/ انا سألتك من الاعضاء وانتي نسيتي ولاء ؟

===============

استفسار للجميع / طبعا بالنسبة للضيوف جاني اقتراحين الاول من رشا زكان اقترحها انو يكون الضيوف مرة من فريق الشباب ومرة من فريق ... ؟

والاقتراح التاني من ابو الزعيم انو مرة يكون ضيف ومرة تكون ضيفة رأيكم ؟

moh55 كتب:الظاهر انو الدكتوره رفعت الرايه البيضاء ودى حاجه متوقعه نسبة لانو بتتبع الى فريق ال..... وديل ما بهمهم ومسألة الانسحاب عاديه جدا

ومع ذلك برضو بسأل

البوست الذى يحمل عنوان محاوله ذلك الفن الجميل والابداع الرائع
هل استمد الفنان الهامه من الافلام الكرتونيه وكان لديها الاثر الكبير ام ماذا ..؟

ابو لين كتب:الاخت كراش
بعضهم لا يستطيع الاعتزار اذا اذى الاخرين بقصد او بغيره


فماذا عنك

ابو الزعيم كتب:انت يا بنجو نجيب سيرة العرس تتجرس
ونتكلم عن مشروعك بتاع الكوافير برضو تتجرس وتقول مستقيل
نجي في كرسي الاحتراف برضو كابي الجرسة انت يا اخوي مالك طوالى متجرس
ياخ ما تلاوز معاك معلم واي سؤال يغلبك باصيه لي واحد من العجايز بساعدك ولا اعمل ما سامع
بطل الجرسه وقول لينا
بعد البطاقة الشخصية
كم مره دخلت في علاقة عاطفية ودون خجل
وهل الان انت تعيش احدى هذه الحالات


:oops: :oops: والليلة صاحبكم اتجرس تاني :oops: :oops:

وليد الطيب كتب:بنجوووووووووووووووور بطل الجرسة وجاوب
الراجيك ما هين